கோவை பப்களுக்கு காவல்துறை புதிய கட்டுப்பாடுகள் – FL-2, FL-3 பார்களின் மூடும் நேரம் அறிவிப்பு

Coimbatore: கோவை மாநகர எல்லைக்குட்பட்ட பகுதிகளில் FL-2 மற்றும் FL-3 உரிமம் பெற்று பப்களாகச் செயல்பட்டு வரும் அனைத்து மதுபானக் கூடங்களின் உரிமையாளர்கள், உரிமதாரர்கள் மற்றும் மேலாளர்களுக்கு கோவை மாநகர் வடக்கு காவல் துணை ஆணையர் கடுமையான அறிவுறுத்தல்களை வழங்கியுள்ளார்.

அனைத்து மதுபானக் கூடங்களும் அனுமதிக்கப்பட்ட நேரத்திற்குள் மட்டுமே செயல்பட வேண்டும் என அறிவுறுத்தப்பட்டுள்ளது. இதன்படி, FL-2 பார்கள் இரவு 11.00 மணிக்குள் மூடப்பட வேண்டும் என்றும், FL-3 பார்கள் இரவு 12.00 மணிக்குள் மூடப்பட வேண்டும் என்றும் தெரிவிக்கப்பட்டுள்ளது. அனுமதியற்ற விளம்பர நிகழ்ச்சிகள் மற்றும் சிறப்பு நிகழ்ச்சிகள் எதுவும் நடத்தக்கூடாது என்றும் கட்டளையிடப்பட்டுள்ளது.

பள்ளி மற்றும் கல்லூரி மாணவர்கள் உள்ளிட்ட குறைந்த வயதுடைய நபர்களை எக்காரணம் கொண்டும் வளாகத்திற்குள் அனுமதிக்கக் கூடாது என கண்டிப்புடன் தெரிவிக்கப்பட்டுள்ளது. பப்களின் உரிமையாளர்கள் மற்றும் மேலாளர்கள் பப்களில் நடைபெறும் அன்றாட நடவடிக்கைகளைத் தனிப்பட்ட முறையில் கண்காணித்து, சட்டவிரோத செயல்கள் மற்றும் பொது அமைதிக்குப் பங்கம் விளைவிக்கும் சம்பவங்கள் நடைபெறாமல் உறுதி செய்ய வேண்டும் என அறிவுறுத்தப்பட்டுள்ளது.

வளாகத்திற்குள் தாக்குதல், பாலியல் தொந்தரவு, பொதுமக்களுக்கு இடையூறு அல்லது இதர சட்டவிரோத செயல்கள் ஏதேனும் நடைபெற்றால், உடனடியாக சம்பந்தப்பட்ட காவல் நிலையத்திற்குத் தகவல் தெரிவிக்க வேண்டும் என கூறப்பட்டுள்ளது. சம்பந்தப்பட்ட காவல் நிலைய அதிகாரிகள் அவ்வப்போது ஆய்வு மேற்கொண்டு, மேற்கண்ட அறிவுறுத்தல்கள் மற்றும் உரிம நிபந்தனைகள் முறையாகப் பின்பற்றப்படுகிறதா என்பதைக் கண்காணிப்பார்கள்.

எனவே, கோயம்புத்தூர் மாநகரில் FL-2 மற்றும் FL-3 உரிமம் பெற்று பப்களாகச் செயல்பட்டு வரும் அனைத்து மதுபானக் கூடங்களின் உரிமையாளர்கள், உரிமதாரர்கள் மற்றும் மேலாளர்கள் மேற்கண்ட அறிவுறுத்தல்களை தவறாமல் பின்பற்ற வேண்டும். விதிமுறைகளை மீறுவோர் மீது கடுமையான சட்ட நடவடிக்கை மேற்கொள்ளப்படும் என மாநகர காவல் ஆணையர் எச்சரித்துள்ளார்.