கோவை சுந்தராபுரத்தில் ஓட்டுநருக்கு திடீர் வலிப்பு – கட்டுப்பாட்டை இழந்து கடைக்குள் புகுந்த பள்ளி வேன்; உயிர் தப்பிய மாணவர்கள்

Coimbatore: கோவை சுந்திராபுரம், எல்.ஐ.சி. காலனி பகுதியில் தனியார் பள்ளி வேன் ஓட்டுநருக்கு திடீரென வலிப்பு ஏற்பட்டதால் வாகனம் கட்டுப்பாட்டை இழந்து அருகிலிருந்த கடைக்குள் புகுந்து விபத்துக்குள்ளானது. எனினும், இந்த விபத்தில் மாணவர்கள் மற்றும் பொதுமக்கள் எவருக்கும் காயமின்றி அனைவரும் அதிர்ஷ்டவசமாக உயிர் தப்பினர்.

கோவை சுந்திராபுரம் எல்.ஐ.சி. காலனி வழியாக இன்று காலை 8 மணியளவில் தனியார் பள்ளி வாகனம் ஒன்று மாணவர்களை ஏற்றிக்கொண்டு சென்று கொண்டிருந்தது. பள்ளி, கல்லூரி மாணவர்கள் மற்றும் அலுவலகம் செல்வோர் என அப்பகுதி மிகவும் பரபரப்பாகக் காணப்பட்ட நேரத்தில், வேன் ஓட்டுநருக்குத் திடீரென வலிப்பு ஏற்பட்டுள்ளது.

இதனால் ஓட்டுநரின் கட்டுப்பாட்டை இழந்த வாகனம், சாலையோரம் இருந்த கடைக்குள் புகுந்து நின்றது. இந்த விபத்தால் அப்பகுதியில் சிறிது நேரம் பரபரப்பு ஏற்பட்டது. இருப்பினும், வேனில் இருந்த பள்ளி மாணவர்களுக்கோ அல்லது சாலையில் சென்றவர்களுக்கோ எவ்வித உயிர்ச் சேதமோ, காயங்களோ ஏற்படவில்லை.

தகவலறிந்து உடனடியாகச் சம்பவ இடத்திற்கு விரைந்து வந்த காவல்துறையினர், மயக்கமடைந்த நிலையில் இருந்த ஓட்டுநரை மீட்டு அருகிலுள்ள மருத்துவமனையில் அனுமதித்தனர். அங்கு அவருக்குத் தீவிர சிகிச்சை அளிக்கப்பட்டு வருகிறது.

இதற்கிடையே, விபத்தில் சிக்கிய பள்ளி மாணவர்கள் அனைவரும் மாற்றுப் பேருந்து மூலம் பாதுகாப்பாகப் பள்ளிக்கு அனுப்பி வைக்கப்பட்டனர். இச்சம்பவம் குறித்து காவல்துறையினர் விசாரணை மேற்கொண்டு வருகின்றனர்.