பாலக்காடு ரயிலில் 47 பவுன் நகை திருட்டு: கோவையில் நடிகரை கைது செய்த கேரள போலீசார்

Coimbatore: திரைப்படங்கள் மற்றும் குறும்படங்களில் நடிகராகவும், வீடியோ எடிட்டராகவும் பணியாற்றி வந்த ஒருவர், ரயிலில் மூதாட்டியிடம் இருந்து 47 பவுன் தங்க நகைகளைத் திருடிய வழக்கில் கோவையில் கேரள ரயில்வே போலீசாரால் கைது செய்யப்பட்டுள்ளார். சுமார் 600 சிசிடிவி கேமரா பதிவுகளை ஆய்வு செய்து, ஒரு வார கால விசாரணைக்குப் பிறகு அவரைப் போலீசார் கைது செய்துள்ளனர்.

கடந்த நவம்பர் 3ஆம் தேதி சென்னை – திருவனந்தபுரம் மெயில் ரயிலின் S4 பெட்டியில் 66 வயதான குமாரி என்பவர் பயணம் செய்துள்ளார். தனது பேத்தியின் திருமணத்திற்காகப் பல ஆண்டுகளாகச் சேமித்து வைத்திருந்த சுமார் 47 பவுன் தங்க நகைகளைப் பையில் வைத்து படுக்கைக்கு அடியில் வைத்திருந்தார். ரயில் பாலக்காட்டை நெருங்கியபோது நகைப் பை காணாமல் போனதைக் கண்டு அதிர்ச்சியடைந்த அவர், இதுகுறித்து புகார் அளித்தார்.

விசாரணையில், குற்றத்தில் ஈடுபட்ட நபர் தனது அடையாளத்தை மறைப்பதற்காகப் பல்வேறு உத்திகளைக் கையாண்டது தெரியவந்தது. சென்னையிலிருந்து சேலத்திற்கு ஒரு ரயிலிலும், அங்கிருந்து பாலக்காட்டிற்கு மற்றொரு ரயிலிலும் பயணம் செய்துள்ளார். பாலக்காட்டில் இறங்கிய பின்னர் ஆட்டோவில் கே.எஸ்.ஆர்.டி.சி. பேருந்து நிலையத்திற்குச் சென்று, ஐந்து வெவ்வேறு பேருந்துகளில் மாறி மாறிப் பயணித்துள்ளார். சிசிடிவி கேமராக்களில் முகம் பதிவாகாமல் இருக்க முகத்தை மறைத்ததுடன், பயணத்தின்போது ஆடைகளையும் மாற்றியுள்ளார்.

கேரள ரயில்வே காவல் கண்காணிப்பாளர் கிருஷ்ணகுமார் ஐபிஎஸ் மற்றும் ரயில்வே பாதுகாப்புப் படை (RPF) அதிகாரி அம்பு பி.குமார் தலைமையில் அமைக்கப்பட்ட தனிப்படையினர், சென்னை முதல் திருவனந்தபுரம் வரையிலான ரயில் வழித்தடங்களில் சுமார் 600 சிசிடிவி கேமரா பதிவுகளை ஆய்வு செய்தனர். முதலில் 10 சந்தேக நபர்களை அடையாளம் கண்ட போலீசார், பின்னர் அவர்களின் எண்ணிக்கையை ஐந்தாகக் குறைத்து, டிஜிட்டல் தடயவியல், சமூக வலைதளப் பதிவுகள் மற்றும் செல்போன் டவர் சிக்னல்கள் மூலம் விசாரணையைத் தீவிரப்படுத்தினர்.

இதில், திண்டுக்கல்லைச் சேர்ந்த பாலமுருகன் என்பவர் குற்றத்தில் ஈடுபட்டது தெரியவந்தது. இதையடுத்து, கோவையில் அவர் தங்கியிருந்த வாடகை வீட்டில் வைத்து போலீசார் அவரைக் கைது செய்தனர். அவரிடமிருந்து முதற்கட்டமாக 36.42 பவுன் தங்க நகைகள் மீட்கப்பட்டன.

விசாரணையில், பாலமுருகன் தமிழ் திரைப்படங்கள் மற்றும் குறும்படங்களில் நடிகராகவும், வீடியோ எடிட்டராகவும் பணியாற்றி வந்தது தெரியவந்தது. திருட்டுச் சம்பவத்திற்குப் பிறகு தனது சொந்த ஊரான திண்டுக்கல்லுக்குச் சென்று குடும்பத்தினருடன் தீபாவளியைக் கொண்டாடியுள்ளார். மேலும், ஊர் மக்களுக்குப் பரிசுப் பொருட்களையும் வழங்கியுள்ளார்.

ஏற்கனவே மதுரையில் ரயிலில் மடிக்கணினி திருடிய வழக்கில் 40 நாட்கள் சிறையில் இருந்ததும், ரயில்களில் பயணிகளின் உடைமைகளைக் குறிவைத்துத் திருடும் கும்பலுடன் தொடர்பில் இருந்ததும் விசாரணையில் தெரியவந்துள்ளதாக போலீசார் தெரிவித்தனர்.