கந்த சஷ்டி விரதம் தொடக்கம்: வண்ண விளக்குகளால் ஜொலிக்கும் மருதமலை; திரளான பக்தர்கள் தரிசனம

கோவை: கோவை மேற்கு தொடர்ச்சி மலை அடிவாரத்தில் அமைந்துள்ள பிரசித்தி பெற்ற மருதமலை சுப்பிரமணிய சுவாமி திருக்கோவிலில் கந்த சஷ்டி விரதம் இன்று தொடங்கியது. அதிகாலை முதலே ஏராளமான பக்தர்கள் கோவிலுக்கு வருகை தந்து முருகப்பெருமானை தரிசனம் செய்து விரதத்தைத் தொடங்கினர்.

முருகப்பெருமானின் ஏழாம் படை வீடு என பக்தர்களால் போற்றப்படும் மருதமலை திருக்கோவிலில் ஆண்டுதோறும் கந்த சஷ்டி விழா வெகு விமரிசையாகக் கொண்டாடப்படுவது வழக்கம். அந்த வகையில், இந்த ஆண்டுக்கான கந்த சஷ்டி விரதம் இன்று தொடங்கியுள்ளதை முன்னிட்டு, பலர் ஆறு நாட்கள் விரதம் மேற்கொண்டு விழாவில் பங்கேற்கத் தயாராகி வருகின்றனர்.

விழாவையொட்டி, கோவில் நிர்வாகம் மற்றும் இந்து சமய அறநிலையத்துறை சார்பில் பக்தர்களின் வசதிக்காகப் பல்வேறு ஏற்பாடுகள் செய்யப்பட்டுள்ளன. பக்தர்கள் சிரமமின்றி சாமி தரிசனம் செய்வதற்கான அடிப்படை வசதிகள் மற்றும் பாதுகாப்பு ஏற்பாடுகளும் மேற்கொள்ளப்பட்டுள்ளன.

மேலும், மருதமலை திருக்கோவிலின் ராஜகோபுரம், படிக்கட்டுகள் மற்றும் கோவில் வளாகம் உள்ளிட்ட பகுதிகள் வண்ண வண்ண மின்விளக்குகளால் அலங்கரிக்கப்பட்டுள்ளன. இரவு நேரத்தில் ஒளிரும் விளக்குகளால் மலைக்கோவில் முழுவதும் கண்கவர் தோற்றத்தில் காட்சியளிக்கிறது.

மலை உச்சியில் அமைந்துள்ள திருக்கோவில் வண்ண விளக்குகளால் ஜொலிக்கும் காட்சிகள் பக்தர்கள் மற்றும் பொதுமக்களைக் கவர்ந்துள்ளன. இதனால் மருதமலை கோவில் விழாக்கோலம் பூண்டுள்ளது.

கந்த சஷ்டி விழாவின் முக்கிய நிகழ்வான சூரசம்ஹாரத்தைக் காணவும், முருகப்பெருமானின் அருளைப் பெறவும் அடுத்தடுத்த நாட்களில் பக்தர்களின் வருகை அதிகரிக்கும் என எதிர்பார்க்கப்படுகிறது.