தீபாவளி பண்டிகையை முன்னிட்டு கோவையில் 1,000 போலீசார் பாதுகாப்புப் பணியில் குவிப்பு

Coimbatore: தீபாவளி பண்டிகையை முன்னிட்டு கோவை மாநகரில் பொதுமக்கள் பாதுகாப்பாக பண்டிகையை கொண்டாட வகை செய்யும் வகையில் சுமார் 1,000 காவலர்கள் பாதுகாப்பு பணியில் ஈடுபடுத்தப்பட்டுள்ளனர்.

மேற்கு மண்டலம் (பொ) கோவை மாநகர காவல் ஆணையர் திருமதி R.V. ரம்யா பாரதி, IPS., அவர்களது உத்தரவின்படி இந்த பாதுகாப்பு நடவடிக்கைகள் மேற்கொள்ளப்பட்டுள்ளன. பள்ளி, கல்லூரிகள் மற்றும் தொழில் நிறுவனங்களுக்கு விடுமுறை அளிக்கப்பட்டுள்ளதை முன்னிட்டு, பொதுமக்கள் தங்களது சொந்த ஊர்களுக்கும் வெளியூர்களுக்கும் எவ்வித சிரமமுமின்றி பேருந்துகளில் ஏறி பயணம் செய்ய ஏதுவாக காந்திபுரம், சாய்பாபா காலனி, உக்கடம் மற்றும் சிங்காநல்லூர் பேருந்து நிலையங்கள், கொடிசியா மற்றும் சிங்காநல்லூர் LG மைதானம் தற்காலிக பேருந்துநிலையம் ஆகியவற்றில் கூடுதல் காவலர்கள் நியமிக்கப்பட்டு பலத்த பாதுகாப்பு ஏற்பாடுகள் மேற்கொள்ளப்பட்டுள்ளன.

கூட்ட நெரிசலைப் பயன்படுத்தி குற்றச் சம்பவங்கள் நடைபெறாமல் தடுக்கும் வகையில், பேருந்து நிலையங்களில் உள்ள கண்காணிப்பு கேமராக்கள் மூலம் தீவிர கண்காணிப்பு மேற்கொள்ளப்பட்டு வருகிறது. மேலும், குற்றப்பிரிவு காவலர்கள் சாதாரண உடையில் பேருந்துகளில் பயணம் செய்து கண்காணிப்புப் பணியில் ஈடுபட்டு வருகின்றனர். பொதுமக்களுக்கு பாதுகாப்பு தொடர்பான விழிப்புணர்வு அறிவுரைகளும், பேருந்துகளில் காவலர்கள் மூலமாக தொடர்ந்து வழங்கப்பட்டு வருகின்றன.

தீபாவளி பண்டிகையை முன்னிட்டு சாலை விபத்துக்களை தடுக்கும் வகையில், இளைஞர்கள் அதிவேகமாக வாகனம் ஓட்டுவதை தடுக்கும் வகையிலும், மதுபோதையில் வாகனம் ஓட்டுபவர்கள் மீது சட்டப்படி நடவடிக்கை எடுக்கவும் போக்குவரத்து காவலர்கள் மூலமாக 22 இடங்களில் தற்காலிக வாகன சோதனை செய்யப்பட்டு வருகிறது.

பொதுமக்கள் தீபாவளி பண்டிகைக்காக வெளியூர் செல்லும்போது, தங்களது அருகிலுள்ள காவல் நிலையத்திலோ அல்லது கோவை மாநகர காவல் கட்டுப்பாட்டு அறை தொலைபேசி எண் 94981 81213 மூலமாகவோ தகவல் தெரிவித்து செல்லுமாறு கேட்டுக்கொள்ளப்படுகிறார்கள். அவ்வாறு தகவல் தெரிவிக்கும் பொதுமக்களின் வீடுகளை காவல்துறையின் ரோந்து காவலர்கள் மூலமாக கண்காணிக்க உரிய நடவடிக்கை மேற்கொள்ளப்படும்.

குற்றச் சம்பவங்களை தடுக்கும் வகையில், ஹோட்டல்கள், தங்கும் விடுதிகள், தனியார் தங்கும் விடுதிகள் மற்றும் தொழிலாளர்கள், கல்லூரி மாணவர்கள் தங்கியுள்ள வீடுகளில் சந்தேக நபர்கள் மற்றும் குற்றப் பின்னணி கொண்ட நபர்கள் தங்கியுள்ளனரா என்பது குறித்து திடீர் சோதனைகள் மேற்கொள்ளப்பட்டும், FRS செயலி மூலமாக சோதனை செய்யப்பட்டு வருகின்றன.

தீபாவளி பண்டிகையை முன்னிட்டு திரையரங்குகள், கோவில்கள் மற்றும் பூங்காக்கள் ஆகிய இடங்களிலும் காவலர்கள் நியமிக்கப்பட்டு கண்காணிக்க நடவடிக்கை எடுக்கப்பட்டுள்ளது.

கோவை மாநகர காவல்துறை, மாநகராட்சி மற்றும் தீயணைப்புத் துறையினருடன் இணைந்து, உரிமம் பெற்ற பட்டாசுக் கடைகளில் சட்டவிரோத நடவடிக்கைகள் அல்லது பாதுகாப்பு விதிமீறல்கள் நடைபெறுகின்றனவா அல்லது உரிமம் பெறாமல் பட்டாசு விற்பனை ஏதும் நடைபெற்று வருகிறதா என்பது குறித்தும் தொடர்ந்து ஆய்வு மேற்கொள்ளப்பட்டு வருகிறது.

பொதுமக்கள் காவல்துறையினரின் அறிவுரைகளைப் பின்பற்றி பாதுகாப்பான முறையில் தீபாவளி பண்டிகையைக் கொண்டாடுமாறு கோவை மாநகர காவல்துறை கேட்டுக்கொள்கிறது.

காவல்துறை தலைவர், மேற்கு மண்டலம் (பொ) கோவை மாநகர காவல் ஆணையர் திருமதி R.V. ரம்யா பாரதி, IPS., அவர்கள் அனைவருக்கும் தனது தீபாவளி நல்வாழ்த்துகளைத் தெரிவித்துள்ளார். அனைவரும் பாதுகாப்பான, மகிழ்ச்சியான மற்றும் அமைதியான தீபாவளியைத் தங்கள் குடும்பத்தினருடன் கொண்டாடி மகிழ வாழ்த்துகளைத் தெரிவித்துக் கொண்டுள்ளார். மேலும், பொதுமக்கள் தீபாவளிப் பண்டிகையை பாதுகாப்பாகக் கொண்டாடும் வகையில், பட்டாசுகளை உரிய பாதுகாப்பு வழிமுறைகளைப் பின்பற்றி வெடிக்கவும், குழந்தைகள் பட்டாசு வெடிக்கும்போது பெரியவர்கள் உடனிருந்து கண்காணிக்கவும், போக்குவரத்து விதிகளைப் பின்பற்றவும் கேட்டுக்கொண்டுள்ளார்.