தீபாவளி போனஸ் வழங்கக் கோரி பாரதியார் பல்கலைக்கழகத் தொழிலாளர்கள் நாளை ஆர்ப்பாட்டம்

Coimbatore: பாரதியார் பல்கலைக்கழகத்தில் பணியாற்றும் தற்காலிகத் தொழிலாளர்களுக்கு தீபாவளி போனஸாக ரூ.15,000 வழங்க வேண்டும் என பாரதியார் பல்கலைக்கழகத் தொழிலாளர் சங்கம் கோரிக்கை விடுத்துள்ளது.

இதுகுறித்து சங்கத்தின் பொதுச்செயலாளர் எம். ரமேஷ்குமார், கோவை C2 பந்தய சாலை காவல் நிலையத்திற்கு அனுப்பியுள்ள கடிதத்தில், பல்கலைக்கழக நிர்வாகம் ஆண்டுதோறும் வழங்கி வந்த ரூ.10,000 தீபாவளி போனஸைக் கூட இந்த ஆண்டு வழங்காமல் தொழிலாளர்களைப் புறக்கணித்துள்ளதாகக் குறிப்பிட்டுள்ளார்.

இதனைக் கண்டித்து, கடந்த நவம்பர் 2ஆம் தேதி முதல் பல்கலைக்கழகத்தில் தொடர் கண்டன முழக்கம் மற்றும் உள்ளிருப்புப் போராட்டத்தைச் சங்கம் நடத்தி வருவதாக ரமேஷ்குமார் தெரிவித்துள்ளார்.

மேலும், தமிழக அரசின் கவனத்தை ஈர்க்கும் வகையிலும், தற்காலிகத் தொழிலாளர்களுக்கு தீபாவளி போனஸ் வழங்க வலியுறுத்தியும் நவம்பர் 6ஆம் தேதி (நாளை) மாலை 6 மணி முதல் இரவு 8 மணி வரை கோவை தெற்கு வட்டாட்சியர் அலுவலகம் அருகில் கண்டன ஆர்ப்பாட்டம் நடத்தத் திட்டமிட்டுள்ளதாகவும், இதற்கு காவல்துறையினர் அனுமதி வழங்க வேண்டும் என்றும் ரமேஷ்குமார் கோரிக்கை விடுத்துள்ளார்.