கோவை வடக்கு மண்டலத்தில் மாநகராட்சி சார்பில் குப்பை பிரிப்பு, மழைநீர் சேகரிப்பு குறித்து விழிப்புணர்வு

Coimbatore: கோயம்புத்தூர் மாநகராட்சி வடக்கு மண்டலம் வார்டு எண்.14-க்குட்பட்ட சாய்நகர் பகுதியில் மழைநீர் சேகரிப்பு, டெங்கு கொசு ஒழிப்பு, நெகிழி மற்றும் குப்பை தரம் பிரிப்பது குறித்து பொதுமக்களுக்கு விழிப்புணர்வு ஏற்படுத்தப்பட்டது.

மாநகராட்சி சார்பில் இப்பகுதி மக்களுக்கு மழைநீர் சேகரிப்பின் முக்கியத்துவம், டெங்கு கொசு ஒழிப்பு, நெகிழி பொருட்களின் தீமைகள், குப்பை தரம் பிரிப்பது ஆகியவை குறித்து விழிப்புணர்வு துண்டு பிரசுரங்கள் விநியோகிக்கப்பட்டன.

இதனுடன், குடியிருப்போர் நல சங்கம் சார்பில் சாய்நகர் பகுதியில் உள்ள சுமார் 72 குடும்பங்களுக்கு நான்கு வகை குப்பைத்தொட்டிகளும் வழங்கப்பட்டு, குப்பை பிரித்தல் குறித்து பொதுமக்களுக்கு விழிப்புணர்வு ஏற்படுத்தப்பட்டது.

இந்த நிகழ்ச்சியில் உதவி ஆணையர் மோகனசுந்தரி, மாமன்ற உறுப்பினர் சித்ரா, மண்டல சுகாதார அலுவலர் முருகன், சுகாதார ஆய்வாளர் ஜீவமுருகராஜ் மற்றும் மாநகராட்சி அலுவலர்கள் உட்பட பலர் பங்கேற்றனர். இந்நிகழ்ச்சி 04.11.2026 அன்று நடைபெற்றது.