கோவையில் 39.8 கிலோ போதை குட்கா, ஹான்ஸ் புகையிலை பறிமுதல்; இருவர் கைது

Coimbatore: சாயிபாபா காலனியில் பள்ளி மாணவர்கள் மற்றும் இளைஞர்களை குறிவைத்து தடை செய்யப்பட்ட போதை புகையிலைப் பொருட்கள் விற்பனை செய்யப்பட்டதை முறியடித்த போலீசார், 39 கிலோ 867 கிராம் எடையுள்ள குட்கா மற்றும் ஹான்ஸ் புகையிலையை பறிமுதல் செய்து இருவரை கைது செய்துள்ளனர்.

கோவை, சாயிபாபா காலனி வெங்கட்டாபுரம் சந்திப்பு, சிந்தி இன்டர்நேஷனல் பள்ளி அருகே உள்ள பகுதிகளில் இளைஞர்கள் மற்றும் பள்ளி மாணவர்களை குறிவைத்து அரசால் தடை செய்யப்பட்ட போதை புகையிலைப் பொருட்கள் விற்கப்படுவதாக தனிப்படை போலீசாருக்கு ரகசிய தகவல் கிடைத்தது.

தகவலின் பேரில் சாயிபாபா காலனி போலீஸ் ஸ்டேசன் போலீசார் சம்பவ இடத்திற்கு விரைந்து சென்று தீவிர சோதனையில் ஈடுபட்டனர். அப்போது பள்ளி அருகே நின்று கொண்டு ரகசியமாக போதை புகையிலை விற்றுக் கொண்டு இருந்த 2 வாலிபர்களை போலீசார் சுற்றி வளைத்து பிடித்தனர்.

அவர்களிடம் இருந்து விற்பனைக்காக பதுக்கி வைக்கப்பட்டு இருந்த கூல்லிப் டி - 430 பாக்கெட் (7 கிலோ), கூல்லிப் ஓ - 40 பாக்கெட் (3.859 கிலோ), வி-1 - 122 பாக்கெட் (1.024 கிலோ), விமல் - 112 பாக்கெட் (6.384 கிலோ), ஹான்ஸ் - 72 பாக்கெட் (21.600 கிலோ) என மொத்தம் 39 கிலோ 867 கிராம் எடையுள்ள 776 பாக்கெட் தடை செய்யப்பட்ட போதை புகையிலைப் பொருட்கள் மற்றும் ரொக்கப் பணம் ரூ.2,170 பறிமுதல் செய்யப்பட்டன.

விசாரணையில் பிடிபட்டவர்கள் புதுக்கோட்டை மாவட்டம் ஆவுடையார்கோவிலைச் சேர்ந்த ராமநாதன் மகன் பிரவீன் (25) மற்றும் சிவகங்கை மாவட்டம் கொல்லங்குடி அழகபுரி சௌமியநாராயணபுரத்தைச் சேர்ந்த கமல்மைதீன் மகன் அசாருதீன் (37) என்பது தெரியவந்தது. இதையடுத்து இருவர் மீதும் போலீசார் வழக்குப் பதிவு செய்து கைது செய்தனர்.