இ-டெண்டர் ஹப் முறைக்கு எதிர்ப்பு: கோவையில் பத்திர எழுத்தர்கள் கவன ஈர்ப்பு பிரச்சாரம்

Coimbatore: கோவை வ உ சி பூங்கா மைதானத்தில், சார் பதிவாளர் அலுவலகம் முன்பு பத்திரம் தயாரிக்கும் தொழில் செய்யும் கூட்டமைப்பினர், இ-டெண்டர் ஹப் முறையை அமுல்படுத்த கூடாது, பழைய முறையே தொடர வேண்டும் என்று கோரி கவன ஈர்ப்பு பிரச்சாரம் செய்தனர்.

கோவை மாவட்டத்தில், கணினியில் பத்திரம் தயாரித்து கொடுக்கும் பணியாளர்கள், ஒன்றினைத்த கணினியில் பத்திரம் தயாரிப்போர் கூட்டமைப்பு என்ற அமைப்பின் மூலமாக கோவை வ உ சி பூங்கா மைதானத்தில் ஒன்றினைத்தனர். இந்த கூட்டத்திற்கு தமிழ்நாடு பத்திரம் தயாரிப்போர் கூட்டமைப்பின் தலைவி சந்திரிகா ஜேம்ஸ் தலைமை தாங்கினார்.

இதனைத் தொடர்ந்து செய்தியாளர்களை சந்தித்து பேசிய சந்திரிகா ஜேம்ஸ், எங்களது கோரிக்கையை தமிழக முதல்வருக்கு தெரிவிக்கும் நோக்கில் இந்த கூட்டமாக கூடியிருப்பதாகவும், தமிழக அரசு கொண்டு வரும் 3 பாயிண்ட் திட்டத்திற்கு தங்களுக்கு எதிர்ப்பு இல்லை என்றும் தெரிவித்தார். ஆனால் தமிழக பத்திரப் பதிவுத்துறையில் சுமார் 595 சார் பதிவாளர் அலுவலகங்கள் உள்ளதாகவும், இதனை நம்பி தங்களைப் போல சுமார் 5 லட்சம் பத்திர எழுத்தர்கள் பணிபுரிந்து வருவதாகவும் அவர் குறிப்பிட்டார்.

1865ஆம் ஆண்டு முதல் பத்திரப் பதிவுத்துறையில் எழுத்தர்கள் மூலம் பத்திரப் பதிவு எழுத்துப் பணிகள் நடைபெற்று வருவதாகவும், தற்போது அரசு இதனை தனியார் துறைக்கு மாற்ற பணிகள் மேற்கொண்டு வருவதாகவும் சந்திரிகா ஜேம்ஸ் தெரிவித்தார். இதற்காக இ-டெண்டர் ஹப் மூலம் தனியாருக்கு அழைப்பு அனுப்பப்பட்டுள்ளதாகவும், இத்தகைய திட்டங்களால் பொதுமக்கள் மட்டுமின்றி இந்த தொழிலை நம்பி உள்ள தங்களது வாழ்வாதாரமும் பாதிக்கப்படும் என்று அவர் கவலை தெரிவித்தார்.

மேலும், கடந்த 27 ஆண்டுகளாக இத்துறையில் உரிய தேர்வுகள் நடத்தப்படவில்லை என்றும், இதனால் உரிய அனுமதி பெற முடியாமலே இந்த தொழிலை செய்து வருவதாகவும் சந்திரிகா ஜேம்ஸ் கூறினார். எனவே, தங்களது வாழ்வாதாரத்தை காக்கும் வகையில் பழைய நடைமுறையே தொடர வேண்டும் என்றும், இத்துறையின் சார்பாக பணியாற்றும் தங்களுக்கு உரிய அங்கீகாரம் வழங்க வேண்டும் என்றும் அவர் வலியுறுத்தினார்.

தமிழக முதலமைச்சர் விஜய் மற்றும் பத்திரப் பதிவுத்துறை அமைச்சர் ஆகியோருக்கு சமூக வலைதளங்களின் மூலமாக தங்களது கோரிக்கையை தெரிவித்துள்ளதாகவும், இந்த விஷயத்தில் துறை சார்ந்த அதிகாரிகள் தலையிட்டு உரிய நடவடிக்கை எடுக்க வேண்டும் என்றும் சந்திரிகா ஜேம்ஸ் கேட்டுக்கொண்டார்.

இந்த கூட்டத்தில், கூட்டமைப்பின் பொருளாளர் கவிதா உள்ளிட்ட அனைத்து உறுப்பினர்களும் கலந்து கொண்டனர்.