விமானத்தைவிட 3 மடங்கு உயரத்தில் மினி செயற்கைக்கோள் ஏவல் – கோவை அரசுப் பள்ளி மாணவர்கள் சாதனை

Coimbatore: கோவையைச் சேர்ந்த அரசு நடுநிலைப் பள்ளி மாணவர்கள் உருவாக்கிய மினி சாட்டிலைட் போன்ற வளிமண்டல ஆய்வுக் கருவி, ஹீலியம் பலூன் மூலம் வெற்றிகரமாக விண்ணில் ஏவப்பட்டு, சுமார் 35 கிலோமீட்டர் உயரத்தை எட்டியுள்ளது. இது வணிக விமானங்கள் பறக்கும் உயரத்தைவிட மூன்று மடங்குக்கும் அதிகமான உயரம் என்பது குறிப்பிடத்தக்கது.

அக்டோபர் 30-ம் தேதி காலை 9 மணிக்கு, துடியலூர் மாநகராட்சி நடுநிலைப் பள்ளியிலிருந்து இந்தக் கருவி ஏவப்பட்டது. சுமார் 3 மணி நேரம் தொடர்ந்து பயணித்த அது, அதிகபட்சமாக 35 கிலோமீட்டர் உயரத்தை எட்டியது.

வானில் என்ன நடக்கிறது என்பதை ஆராயும் வகையில், வெப்பநிலை, காற்றழுத்தம், ஈரப்பதம் ஆகியவற்றைக் கணக்கிடும் சென்சார்கள் மற்றும் காற்றில் உள்ள நுண்துகள்களைச் சேகரிக்கும் கருவி உள்ளிட்ட பல தொழில்நுட்ப வசதிகள் இதில் பொருத்தப்பட்டிருந்தன.

மைனஸ் 60 டிகிரி செல்சியஸ் வரையிலான கடும் குளிரையும் தாங்கி, சுமார் 80 கிலோமீட்டர் தொலைவில் இந்த ஆய்வுக் கருவி தரையிறங்கியது. தேடல் குழுவினர் அதைப் பத்திரமாக மீட்டனர்.

குறிப்பாக, 55 அரசுப் பள்ளி மாணவர்களின் பங்களிப்பில் உருவான இந்த முயற்சி, அவர்களுக்குப் புத்தகத்தில் படிக்கும் அறிவியலை நேரடி ஆராய்ச்சியாகச் செய்து காட்டியுள்ளது.