சமூக வலைதளங்களில் இந்து கடவுள்கள், கோயில்கள் குறித்து அவதூறு: கோவை காவல் ஆணையரிடம் இந்து முன்னணி புகார்

Coimbatore: கோவை மாநகரில் சமூக வலைதளங்கள் மூலம் இந்து மதக் கடவுள்கள், மத நம்பிக்கைகள், கோயில்கள் மற்றும் இந்து முன்னணி இயக்கம் குறித்து இழிவான மற்றும் அவதூறான கருத்துகளைப் பரப்பி வருவோர் மீது உடனடியாகச் சட்ட நடவடிக்கை எடுக்கக் கோரி, இந்து முன்னணி சார்பில் கோவை மாநகர காவல் ஆணையரிடம் புகார் மனு அளிக்கப்பட்டது.

இந்து முன்னணி மாநில நிர்வாகக் குழு உறுப்பினர் எஸ். சதீஷ் தலைமையில் கோவை மாநகர காவல் ஆணையர் அலுவலகத்தில் இந்தப் புகார் மனு அளிக்கப்பட்டது.

அந்த மனுவில், Instagram, Facebook உள்ளிட்ட பல்வேறு முக்கியச் சமூக வலைதளப் பக்கங்களில் இந்து மதக் கடவுள்கள், புனிதத் தலங்கள், கோயில்கள் மற்றும் இந்து முன்னணி பேரியக்கம் ஆகியவற்றை இழிவுபடுத்தும் வகையிலும், அவதூறான வார்த்தைகளைப் பயன்படுத்தியும் தொடர்ச்சியாகக் காணொளிகளும் பதிவுகளும் வெளியிடப்பட்டு வருவதாகத் தெரிவிக்கப்பட்டுள்ளது.

இது போன்ற திட்டமிட்ட அவதூறுப் பிரச்சாரங்கள் மூலம் இந்து மதத்தினரின் மத உணர்வுகள் தீவிரமாகப் புண்படுவதுடன், சமூகத்தில் அமைதியைக் குலைக்கும் வகையிலும், மத நல்லிணக்கத்திற்குப் பாதிப்பு ஏற்படுத்தும் சூழலும் வேண்டுமென்றே உருவாக்கப்பட்டு வருவதாகக் கவலை தெரிவிக்கப்பட்டுள்ளது.

எனவே, சம்பந்தப்பட்ட சமூக வலைதளக் கணக்குகள், அவதூறுப் பதிவுகள் மற்றும் காணொளிகளைத் தீவிரமாக ஆய்வு செய்து, அவற்றைப் பின்னால் இருந்து இயக்கும் மற்றும் பதிவிட்ட நபர்களை உடனடியாகக் கண்டறிந்து அவர்கள் மீது தகுந்த சட்டப் பிரிவுகளின் கீழ் கடும் நடவடிக்கை எடுக்க வேண்டும் என்றும், கோவையில் மத நல்லிணக்கத்தைப் பாதுகாக்கத் தேவையான பாதுகாப்பு நடவடிக்கைகளை மேற்கொள்ள வேண்டும் என்றும் அந்த மனுவில் வலியுறுத்தப்பட்டுள்ளது.

காவல் ஆணையரிடம் மனு அளிக்கும் இந்நிகழ்வில், இந்து முன்னணி மாநில செயற்குழு உறுப்பினர் தசரதன், கோவை கோட்டச் செயலாளர் பாபா கிருஷ்ணன், உருவை பாலன், குணா, மாவட்ட செய்தித் தொடர்பாளர் தனபால், மாவட்டப் பொதுச் செயலாளர் ஜெய்சங்கர், மாவட்டச் செயலாளர்கள் ஆறுச்சாமி, மகேஸ்வரன், தம்பி சரவணன், சோமசுந்தரம் மற்றும் ஏராளமான மாவட்ட, வட்டார நிர்வாகிகள் உடனிருந்தனர்.