கோவையில் ஜாமீன் நிபந்தனை மீறி தலைமறைவான நபர் மீது புதிய வழக்கு

Coimbatore: ஜாமீன் நிபந்தனையை மீறி நீதிமன்றத்தில் ஆஜராகாமல் தலைமறைவான வாலிபர் மீது கோவை துடியலூர் போலீஸ் ஸ்டேசனில் புதிய வழக்கு பதிவு செய்யப்பட்டுள்ளது.

கோவை, துடியலூர் அண்ணா காலனியைச் சேர்ந்தவர் செல்வராஜ் மகன் கரிகாலன் (28). இவர் மீது ஏற்கனவே துடியலூர் போலீஸ் ஸ்டேசனுக்கு உட்பட்ட பகுதியில் ஆபாசமாக திட்டுதல், தாக்குதல் மற்றும் மிரட்டல் உள்ளிட்ட குற்றப்பிரிவுகளின் கீழ் வழக்கு நிலுவையில் உள்ளது. இந்த வழக்கில் கரிகாலன் கோவை 1-வது மாஜிஸ்திரேட்டு கோர்ட்டில் நிபந்தனை ஜாமீன் பெற்று வெளியில் வந்தார்.

ஜாமீனில் வந்த கரிகாலன் நீதிமன்ற நடவடிக்கைகளுக்கு முறையாக ஆஜராக வேண்டும் என்ற நிபந்தனையை பின்பற்றவில்லை. எந்தவித முன்னறிவிப்போ அல்லது சரியான காரணமோ இன்றி நீதிமன்ற விசாரணையைத் தவிர்த்து தொடர்ந்து தலைமறைவாக இருந்து வந்தார்.

நீதிமன்ற நிபந்தனைகளை மீறி தலைமறைவான கரிகாலன் மீது துடியலூர் போலீஸ் ஸ்டேசனில் புதிய வழக்குப் பதிவு செய்யப்பட்டுள்ளது. தலைமறைவாக சுற்றும் அவரை பிடிக்க போலீஸ் தீவிர விசாரணை மேற்கொண்டு வருகிறது.