வால்பாறை - பொள்ளாச்சி மலைப்பாதையில் நிலச்சரிவு: ஆழியார் சுங்கச்சாவடியில் உணவு, குடிநீரின்றி தவித்த மக்கள்

Coimbatore: கோவை மாவட்டம் வால்பாறை - பொள்ளாச்சி மலைப்பாதையில் ஏற்பட்ட நிலச்சரிவு காரணமாக போக்குவரத்து முற்றிலும் துண்டிக்கப்பட்டதால், ஆழியார் சுங்கச்சாவடி அருகே சிக்கிய பொதுமக்கள் மற்றும் குழந்தைகள் உணவு, குடிநீர் இன்றி கடும் அவதிக்கு உள்ளானது அதிர்ச்சியை ஏற்படுத்தி உள்ளது.

வால்பாறை - பொள்ளாச்சி மலைப்பாதையில் 2-வது கொண்டை ஊசி வளைவு அருகே நேற்றிரவு திடீரென ஏற்பட்ட நிலச்சரிவு மற்றும் ராட்சதப் பாறை சரிவு காரணமாக போக்குவரத்து முற்றிலும் துண்டிக்கப்பட்டது. இதனால் வால்பாறையில் இருந்து ஊர் திரும்ப முடியாமல் ஆழியார் சுங்கச்சாவடி (Aliyar Toll Plaza) அருகில் பொதுமக்கள் மற்றும் குழந்தைகள் சிக்கித் தவித்தனர்.

வால்பாறையில் இருந்து பொள்ளாச்சி மற்றும் சமவெளிப் பகுதிகளுக்குச் சென்று விட்டு மீண்டும் ஊர் திரும்பிய பொதுமக்கள் மற்றும் சுற்றுலாப் பயணிகள் பலர், மலைப்பாதையில் போக்குவரத்து தடைபட்ட காரணத்தினால் நேற்றிரவு முதலே ஆழியார் சுங்கச்சாவடி பகுதியிலேயே காத்து நிற்க வேண்டிய கட்டாயத்திற்கு ஆளானார்கள்.

திடீரென ஏற்பட்ட இந்தத் தடங்கல் காரணமாக, எந்தவொரு முன்னறிவிப்போ அல்லது மாற்று ஏற்பாடுகளோ செய்யப்படவில்லை எனக் கூறப்படுகிறது. இதனால் இரவெல்லாம் குழந்தைகளுடன் வழியிலேயே காத்து இருந்த பொதுமக்களுக்குக் குடிநீரோ அல்லது உணவுப் பொருட்களோ கிடைக்காமல் கடும் பசியாலும் தாகத்தாலும் அவதிக்கு உள்ளானார்கள். குறிப்பாக, கைக்குழந்தைகளுடன் வந்த தாய்மார்கள் பெரும் இன்னல்களைச் சந்தித்து உள்ளனர்.

இயற்கை இடர்ப்பாடு காரணமாகப் போக்குவரத்து தடைபட்டு உள்ள நிலையில், இடைப்பட்ட நேரத்தில் பரிதவிக்கும் பொதுமக்களுக்குத் தேவையான அடிப்படைத் தற்காலிக நிவாரணப் பணிகளோ அல்லது முறையான தகவல்களோ வழங்கப்படாதது பொதுமக்கள் இடையே கடும் கோபத்தை ஏற்படுத்தி உள்ளது.

பாறைகளை அகற்றும் பணிகள் தீவிரமாக நடைபெற்று வந்தாலும், ஆழியார் பகுதியில் நீண்ட நேரமாக முடங்கி உள்ள பொதுமக்களுக்கு உடனடியாக உணவு, குடிநீர் உள்ளிட்ட அடிப்படை வசதிகளைச் செய்து தர வேண்டும் என்றும், போக்குவரத்தை விரைவில் சீரமைக்கத் துறைசார் அதிகாரிகள் விரைந்து நடவடிக்கை எடுக்க வேண்டும் என்றும் கோரிக்கைகள் வலுத்து வருகின்றன.