கோவை மதுக்கரையில் சாலையில் தூங்கிய முதியவர் மீது கார் ஏறி உயிரிழப்பு

Coimbatore: கோவை மதுக்கரை மார்க்கெட் ரோட்டில் சாலையோரத்தில் படுத்து தூங்கிக் கொண்டிருந்த முதியவர் மீது கார் ஏறி பலியான சம்பவம் பெரும் பரபரப்பை ஏற்படுத்தி உள்ளது.

கோவை, சிட்கோ சீனிவாசா நகர் காமராஜர் நகரைச் சேர்ந்தவர் பரன் மாஞ்சியின் மகன் ஆனந்தி மாஞ்சி (வயது 60). இவர் கடந்த 18 ஆம் தேதி அன்று மதுக்கரை மார்க்கெட் ரோட்டில் உள்ள மேம்பாலம் அருகே தீபம் ஸ்டோர்ஸ் முன்பாக சாலையோரத்தில் படுத்து தூங்கிக் கொண்டு இருந்தார்.

அப்போது அங்கு நிறுத்தி வைக்கப்பட்டு இருந்த டொயோட்டா டைகர் காரை, சிட்கோ வசந்தா முல்லை நகர் பகுதியைச் சேர்ந்த நடராஜனின் மகன் நரேஷ் (வயது 22) என்பவர் மேற்கில் இருந்து கிழக்கு நோக்கி திடீரென இயக்கி கிளப்பி உள்ளார். அப்போது எதிர்பாராதவிதமாக சாலையில் படுத்திருந்த முதியவர் ஆனந்தி மாஞ்சி மீது கார் சக்கரம் ஏறி இறங்கியது.

இந்த கோர விபத்தில் பல இடங்களில் எலும்பு முறிவு மற்றும் பலத்த ரத்தக் காயம் அடைந்த ஆனந்தி மாஞ்சி சம்பவ இடத்திலேயே துடிதுடித்து பரிதாபமாக உயிரிழந்தார்.

இதுகுறித்து அப்பகுதியைச் சேர்ந்த மாளியப்பன் (வயது 51) என்பவர் மேற்கு போக்குவரத்து புலனாய்வு பிரிவு போலீஸ் ஸ்டேசனில் புகார் தெரிவித்தார். அதன்பேரில் கார் ஓட்டுநர் நரேஷ் மீது போலீசார் வழக்குப்பதிவு செய்து தீவிர விசாரணை நடத்தி வருகின்றனர்.