கோவை மருதமலை வள்ளியம்மன் கோவிலில் 2,000-க்கும் மேற்பட்ட கொலு கண்காட்சி

கோவை: கோவை மருதமலை அடிவாரத்தில் உள்ள அருள்மிகு ஸ்ரீ வள்ளியம்மன் திருக்கோவிலில், 10-ஆம் ஆண்டு நவராத்திரி விழாவை முன்னிட்டு நடைபெற்று வரும் 2,000-க்கும் மேற்பட்ட கொலு பொம்மைகள் கண்காட்சி பக்தர்கள் மற்றும் பொதுமக்களின் கவனத்தை பெரிதும் ஈர்த்துள்ளது.

கோவை மருதமலை அடிவாரத்தில் அமைந்துள்ள இந்த திருக்கோவிலில் ஆண்டுதோறும் நவராத்திரி விழாவை முன்னிட்டு கொலு உற்சவம் வெகு விமரிசையாகக் கொண்டாடப்படுவது வழக்கம். அந்த வகையில், இந்த ஆண்டு 10-ஆம் ஆண்டு நவராத்திரி விழா நடைபெற்று வருகிறது.

விழாவின் ஆறாம் நாளான இன்று, குழந்தைகளின் பரதநாட்டிய நிகழ்ச்சிகளுடன், பிரம்மாண்டமான கொலு பொம்மைகள் கண்காட்சியும் நடைபெற்றது. இந்தக் கண்காட்சியில் 2,000-க்கும் மேற்பட்ட கொலு பொம்மைகள் பல்வேறு தலைப்புகளில் காட்சிப்படுத்தப்பட்டுள்ளன. நவக்கிரகத் தலங்கள், திருமண விருந்து, விவசாயம், செழிப்பான கிராமங்கள், ஜல்லிக்கட்டு, கரகாட்டம், கிருஷ்ண லீலை, ஐயப்பன் மலை, திருக்கைலாயம், திருமலை வெங்கடேசப் பெருமாள் தரிசனம் உள்ளிட்ட பல்வேறு காட்சிகள் இடம்பெற்றுள்ளன.

குறிப்பாக, இந்திர சபையில் கிரிக்கெட் விளையாடும் வகையில் வடிவமைக்கப்பட்ட விநாயகர் பொம்மைகள் பார்வையாளர்களை வெகுவாகக் கவர்ந்துள்ளன.

மேலும், கும்பகோணம் மரப்பாச்சி பொம்மைகள், சித்தர்கள், திருக்கோவில் பூஜைகள், திருவிளக்கு பூஜை, ஆஞ்சநேயர் உற்சவம் மற்றும் சஞ்சீவி மலை உள்ளிட்ட பல்வேறு சிறப்பம்சங்களும் கண்காட்சியில் இடம்பெற்றுள்ளன.

ஒன்பது நாட்கள் நடைபெறும் நவராத்திரி விழாவையொட்டி, சிறப்பு வழிபாடுகள், பூஜைகள், கலை நிகழ்ச்சிகள் மற்றும் வள்ளியம்மனுக்கு அபிஷேக ஆராதனைகள் நடைபெற்று வருகின்றன. மேலும், விழாவில் பங்கேற்கும் பக்தர்களுக்குத் தினமும் அன்னதானமும் வழங்கப்படுகிறது.

ஒரே இடத்தில் 2,000-க்கும் மேற்பட்ட கொலு பொம்மைகள் காட்சிப்படுத்தப்பட்டுள்ள இந்தக் கண்காட்சி, கோவை பக்தர்கள் மற்றும் பொதுமக்களிடையே பெரும் வரவேற்பைப் பெற்றுள்ளது.