கோவை பூ மார்க்கெட்டில் சுங்க கட்டண உயர்வு விவகாரம் - பூக்களை இறக்கவிடாமல் ஒப்பந்ததாரர் தடுத்ததால் பரபரப்பு

Coimbatore: கோவை பூ மார்க்கெட் பகுதியில் உள்ள மாநகராட்சி மலர் சந்தையில் சுங்க கட்டண உயர்வு தொடர்பான பிரச்சினையால், இன்று பூக்களை இறக்கவிடாமல் ஒப்பந்ததாரர் தடுத்து நிறுத்தியதால் பரபரப்பு ஏற்பட்டது. இறுதியில் போலீசாரும் மாநகராட்சி அதிகாரிகளும் தலையிட்டு பேச்சுவார்த்தை நடத்தியதால், தற்காலிக உடன்பாட்டுடன் வியாபாரம் மீண்டும் தொடங்கியது.

கோவை பூ மார்க்கெட் பகுதியில் உள்ள மாநகராட்சி மலர் சந்தைக்குச் சேலம், சத்தியமங்கலம், நிலக்கோட்டை உள்ளிட்ட பல்வேறு பகுதிகளில் இருந்து தினமும் மலர்கள் இறக்குமதி செய்யப்பட்டு வியாபாரம் நடைபெற்று வருகிறது. இந்த மலர் சந்தைக்குக் கோவையின் பிற பகுதிகள் மட்டுமின்றி, அண்டை மாநிலமான கேரளாவிலிருந்தும் பூக்கள் வாங்க ஏராளமானோர் வந்து செல்கின்றனர். இங்கு வியாபாரம் செய்து வரும் பூ வியாபாரிகள், தாங்கள் கொள்முதல் செய்யும் பூக்களுக்கு மாநகராட்சி நிர்ணயித்த சுங்கக் கட்டணத்தைச் செலுத்தி வந்தனர். இதுவரை டிப்பர் ஒன்றுக்கு ரூ.2-ம், மூட்டைக்கு ரூ.4-ம் சுங்கக் கட்டணமாகச் செலுத்தப்பட்டு வந்தது.

இந்நிலையில், கடந்த 40 நாட்களுக்கு முன்பு மாநகராட்சி சுங்கக் கட்டணம் வசூலிக்கும் ஒப்பந்தத்தை ஆளுங்கட்சியைச் சேர்ந்த நபர் ஒருவர் எடுத்துள்ளார். அதனைத் தொடர்ந்து, அவர் சுங்கக் கட்டணமாக டிப்பர் ஒன்றுக்கு ரூ.5-ம், மூட்டைக்கு ரூ.10-ம் செலுத்த வேண்டும் எனத் தெரிவித்துள்ளார். ஆனால், மாநகராட்சி பைலாவில் உள்ள நிர்ணயிக்கப்பட்ட கட்டணத்தை மட்டுமே செலுத்த முடியும் என்று பூ வியாபாரிகள் தெரிவித்து, கடந்த 40 நாட்களாக உயர்த்தப்பட்ட கட்டணத்தைச் செலுத்த மறுத்து வந்தனர்.

இதற்கிடையே, இன்று பல்வேறு பகுதிகளில் இருந்து மலர் சந்தைக்கு வந்த பூக்களை இறக்கவிடாமல் ஒப்பந்ததாரர் தடுத்து நிறுத்தினார். இதனால் ஆங்காங்கே வாகனங்களில் மூட்டை மூட்டையாகப் பூக்கள் இறக்கப்படாமல் தேங்கின. இதனால் ஆத்திரமடைந்த வியாபாரிகள் ஒப்பந்ததாரருடன் வாக்குவாதத்தில் ஈடுபட்டனர். தகவலறிந்து வந்த ஆர்.எஸ்.புரம் போலீசார் மற்றும் மாநகராட்சி அதிகாரிகள், வியாபாரிகள் மற்றும் ஒப்பந்ததாரரிடம் பேச்சுவார்த்தை நடத்தினர். இறுதியில், வியாபாரிகளுக்கும் ஒப்பந்ததாரருக்கும் இடையே நடைபெற்ற சமரசப் பேச்சுவார்த்தையின் போது, தான் அதிக தொகைக்கு ஒப்பந்தம் எடுத்துள்ளதால் ஒத்துழைப்பு வழங்குமாறு ஒப்பந்ததாரர் கோரிக்கை விடுத்தார்.

இதையடுத்து, டிப்பர் ஒன்றுக்கு ரூ.4-ம், மூட்டைக்கு ரூ.9-ம் வழங்க வியாபாரிகள் தற்காலிகமாக ஒப்புக்கொண்டனர். இதனால் பேச்சுவார்த்தையில் உடன்பாடு ஏற்பட்டு, மலர் லோடுகள் இறக்கப்பட்டு வியாபாரம் மீண்டும் தொடங்கியது. கடந்த எட்டு ஆண்டுகளாகச் சுங்கக் கட்டணம் வசூலிக்க ஒப்பந்தம் எதுவும் விடப்படாமல், நேரடியாக மாநகராட்சிக்குக் கட்டணம் செலுத்தப்பட்டு வந்தது. தற்போது புதிதாகப் பொறுப்பேற்றுள்ள ஆளுங்கட்சி ஆட்சியில் மலர் சந்தை சுங்கக் கட்டணம் ஒப்பந்தத்திற்கு விடப்பட்டுள்ளதாகவும், இதுபோன்று அதிக கட்டணம் வசூல் செய்தால் மலர் விவசாயிகளும் வியாபாரிகளும் கடுமையான பாதிப்பைச் சந்திக்கும் சூழல் உருவாகும் என வியாபாரிகள் கவலை தெரிவித்துள்ளனர்.