கோவை போத்தனூர் – அசாம் இடையே பண்டிகைக் கால சிறப்பு ரயில் அறிவிப்பு

Coimbatore: ஆயுத பூஜை பண்டிகையை முன்னிட்டு, பயணிகளின் கூட்ட நெரிசலைக் குறைக்கும் வகையில் கோவை போத்தனூர் மற்றும் அசாம் மாநிலம் நியூ டின்சுகியா இடையே சிறப்பு ரயில் இயக்கப்பட உள்ளதாக தெற்கு ரயில்வேயின் சேலம் கோட்டம் அறிவித்துள்ளது.

கோவை மற்றும் சுற்றுவட்டாரப் பகுதிகளில் பணிபுரியும் அசாம் மாநிலத் தொழிலாளர்கள் சொந்த ஊர்களுக்குச் செல்வதற்கு இந்தச் சிறப்பு ரயில் கூடுதல் வசதியாக அமையும்.

அதன்படி, ரயில் எண் 06101 (போத்தனூர் – நியூ டின்சுகியா சிறப்பு ரயில்) அக்டோபர் 16-ஆம் தேதி அதிகாலை 4.30 மணிக்குப் போத்தனூர் சந்திப்பில் இருந்து புறப்பட்டு, அக்டோபர் 19-ஆம் தேதி அதிகாலை 4.30 மணிக்கு நியூ டின்சுகியாவைச் சென்றடையும்.

மறுமார்க்கத்தில், ரயில் எண் 06102 (நியூ டின்சுகியா – போத்தனூர் சிறப்பு ரயில்) அக்டோபர் 19-ஆம் தேதி இரவு 8 மணிக்கு நியூ டின்சுகியாவில் இருந்து புறப்பட்டு, அக்டோபர் 22-ஆம் தேதி இரவு 11 மணிக்குப் போத்தனூர் சந்திப்பை வந்தடையும்.

இந்தச் சிறப்பு ரயில் திருப்பூர், ஈரோடு, சேலம், ஜோலார்பேட்டை வழியாக இயக்கப்படும். மேலும், காட்பாடி, பெரம்பூர், விஜயவாடா, ராஜமுந்திரி, துவ்வாடா, விஜயநகரம், பலாசா, புவனேஸ்வர், கட்டாக், கரக்பூர், கவுகாத்தி, திமாபூர் உள்ளிட்ட பல்வேறு ரயில் நிலையங்களிலும் நின்று செல்லும்.

திரும்பும் பயணத்தின்போது, அக்டோபர் 22-ஆம் தேதி ஜோலார்பேட்டை ரயில் நிலையத்தில் மாலை 5.50 மணி முதல் 5.55 மணி வரையிலும், சேலத்தில் இரவு 7.15 மணி முதல் 7.20 மணி வரையிலும், ஈரோட்டில் இரவு 8.15 மணி முதல் 8.25 மணி வரையிலும், திருப்பூரில் இரவு 9.05 மணி முதல் 9.10 மணி வரையிலும் நின்று செல்லும்.

இந்தச் சிறப்பு ரயிலில் இரண்டாம் வகுப்பு இருக்கை வசதி பெட்டிகள், பொதுப் பயணத்திற்கான இரண்டாம் வகுப்பு பெட்டிகள் மற்றும் சரக்கு மற்றும் பிரேக் வேன் பெட்டிகள் இடம்பெறும். மாற்றுத்திறனாளிப் பயணிகளுக்கான வசதிகளும் ஏற்படுத்தப்பட்டுள்ளன.