தமிழக முதலமைச்சர் வருகையை முன்னிட்டு கோவையில் பாதுகாப்பு ஏற்பாடுகள் தீவிரம்

Coimbatore: கோவை, காந்திபுரம் மத்திய பேருந்து நிலையம் அருகே சுமார் ரூ.300 கோடி செலவில் அதிநவீன வசதிகளுடன் கட்டப்பட்டுள்ள பிரம்மாண்டமான பெரியார் அறிவுலகம் மற்றும் ஆராய்ச்சி மையத்தை தமிழக முதலமைச்சர் விஜய் வருகிற அக்டோபர் 16-ஆம் தேதி நேரில் திறந்து வைக்கிறார்.

இப்பணிகளுக்கு கடந்த 2024-ஆம் ஆண்டு நவம்பர் 6-ஆம் தேதி அடிக்கல் நாட்டப்பட்டு பணிகள் துரிதமாக நடைபெற்று வந்த நிலையில், தற்போது அனைத்துக் கட்டுமானப் பணிகளும் முழுமையாக நிறைவடைந்துள்ளன. சுமார் 1,98,000 சதுர அடி பரப்பளவில் 8 தளங்களுடன் கம்பீரமாக உருவாக்கப்பட்டுள்ள இந்த அறிவுலகத்தில், ஒரே நேரத்தில் 1 லட்சம் புத்தகங்கள் இடம்பெறும் நூலகம், விரிவான ஆராய்ச்சிப் படிப்பகங்கள், அறிவியல் மையம், மாற்றுத் திறனாளிகள் மற்றும் குழந்தைகளுக்கான பிரத்யேக வசதிகள் மற்றும் டிஜிட்டல் நூலகம் ஆகியவை சர்வதேசத் தரத்தில் அமைக்கப்பட்டுள்ளன.

அக்டோபர் 16 அன்று காலை 11 மணிக்கு கோவை விமான நிலையம் வந்தடையும் முதலமைச்சருக்கு முக்கியப் பிரமுகர்கள் புத்தகங்கள் வழங்கி வரவேற்பு அளிக்கின்றனர்.

தொடர்ந்து காலை 11.45 மணிக்கு விழா நடைபெறும் காந்திபுரம் நிகழ்விடத்திற்கு வரும் அவர், தந்தை பெரியாரின் திருவுருவச் சிலையையும், பெரியார் அறிவுலகக் கல்வெட்டையும் திறந்து வைக்கிறார். பின்னர் வரவேற்பறை, அறிவியல் மையம், குழந்தைகள் நூலகம், புத்தக வாசிப்புப் பிரிவு மற்றும் டிஜிட்டல் நூலகம் உள்ளிட்ட தளங்களை நேரில் பார்வையிடுகிறார்.

விழா மேடையில் பிற்படுத்தப்பட்டோர் நலத்துறை அமைச்சர் வரவேற்புரை நிகழ்த்த, முக்கியப் பிரமுகர்கள் முதலமைச்சர் விஜய்-க்கு நினைவுப் பரிசு வழங்குகின்றனர். தொடர்ந்து முடிவுற்ற பல்வேறு அரசுத் திட்டங்களைத் திறந்து வைத்து, புதிய பணிகளுக்கு அடிக்கல் நாட்டும் முதலமைச்சர், 100 பயனாளிகளுக்கு நலத்திட்ட உதவிகளையும் வழங்கி உரையாற்றுகிறார்.

மாவட்ட ஆட்சித்தலைவரின் நன்றியுரை மற்றும் நாட்டுப்பண்ணுடன் விழா நிறைவடைந்ததும் மதியம் 1.40 மணி அளவில் முதலமைச்சர் கோவை விமான நிலையம் சென்றடைகிறார்.

முதலமைச்சரின் வருகையை முன்னிட்டு கோவை மாவட்ட ஆட்சியர் பவன்குமார் கிரியப்பனார் மற்றும் மேற்கு மண்டலக் காவல் துறை தலைவர் (IG) ரம்யாபாரதி உள்ளிட்ட உயர் அதிகாரிகள் நிகழ்ச்சி நடைபெறும் இடங்களை நேரில் பார்வையிட்டுப் பாதுகாப்பு ஏற்பாடுகளை ஆய்வு செய்தனர். மேலும் அப்பகுதி சாலைகள் மற்றும் வீதிகளைத் தூய்மைப்படுத்தும் பணிகளும், போக்குவரத்துப் பாதுகாப்பு நடவடிக்கைகளும் தீவிரப்படுத்தப்பட்டுள்ளன.