News

கோவை மாநகராட்சி மண்டல அலுவலகங்களில் மழைநீர் சேகரிப்பு குறித்து ஆலோசனைக் கூட்டம்

SimpliCity News Team · 2 days ago

Coimbatore: கோயம்புத்தூர் மாநகராட்சி அனைத்து மண்டலங்களிலும் மழைநீர் சேகரிப்பின் அவசியம் குறித்தும், மழைநீர் கட்டமைப்புகளை அமைப்பது குறித்தும் பொதுமக்களுக்கு விழிப்புணர்வு ஏற்படுத்துவது தொடர்பாகவும் அனைத்து அலுவலர்களுடனான ஆலோசனைக் கூட்டம் இன்று (01.10.2026) மண்டல உதவி ஆணையர்கள் தலைமையில், அந்தந்த மண்டல அலுவலகங்களில் நடைபெற்றது.

இக்கூட்டத்தில், மழைநீர் சேகரிப்பின் அவசியம் குறித்து தெளிவாக விளக்கப்பட்டது. மாநகராட்சிக்கு சொந்தமான பூங்காக்கள், காலியிடம் மாநகராட்சி கட்டிடங்கள், திருமண மண்டபங்கள், சமுதாயக்கூடங்கள், மருத்துவமனைகள் ஆகிய கட்டடங்களில் மழைநீர் சேகரிப்பு தொட்டி கட்டமைப்பு ஏற்கனவே உள்ளதை பழுது பார்த்து சரி செய்திடவும் அறிவுறுத்தப்பட்டது.

புதிதாக மழைநீர் சேகரிப்பு கட்டமைப்பு ஏற்படுத்த வார்டு பகுதிகளில் மழைநீர் தேங்கும் இடங்களில் எக்கோ ப்ளாக்ஸ் கொண்டு மழைநீர் சேகரிப்பு கட்டமைப்பு ஏற்படுத்திடவும் தீர்மானிக்கப்பட்டது. அந்தவகையில், வடக்கு மண்டலத்தில் உள்ள சங்கனூர் பள்ளம், சிங்காநல்லூர் பள்ளம், மணிகாரம்பாளையம் பள்ளம் ஆகியவற்றை தூர்வாரி சுத்தம் செய்திடவும் உத்தரவிடப்பட்டது.

மாநகரில் ஆங்காங்கே மழைக்காலங்களில் மழைநீர் எளிதாக செல்லும் வகையில் மழைநீர் வடிகால்களை தூர்வாரிடவும், அனைத்து வீடுகளிலும் மழைநீர் சேகரிப்பு கட்டமைப்பு உள்ளதா என்பதனை நேரில் பார்வையிட வேண்டும் எனவும் அலுவலர்களுக்கு தெரிவிக்கப்பட்டது.

இந்த ஆலோசனை கூட்டத்தில், அனைத்து மண்டல செயற்பொறியாளர்கள், உதவி செயற்பொறியாளர்கள், மண்டல சுகாதார அலுவலர்கள், உதவி பொறியாளர்கள், இளநிலை பொறியாளர்கள், குடிநீர் பிரிவு அலுவலர்கள், சுகாதார ஆய்வாளர்கள், சுகாதார பணி மேற்பார்வையாளர்கள் உட்பட பலர் கலந்து கொண்டனர்.

Coimbatore Corporation Rainwater Harvesting Eco Blocks Zonal Office Civic Awareness Drainage Cleaning

கோவை மாநகராட்சி மண்டல அலுவலகங்களில் மழைநீர் சேகரிப்பு குறித்து ஆலோசனைக் கூட்டம்

Related stories