கோவை உக்கடம் பேருந்து நிலைய கட்டுமானப் பணிகளை மாநகராட்சி ஆணையாளர் ஆய்வு

Coimbatore: கோயம்புத்தூர் மாநகராட்சி மத்திய மண்டலத்திற்கு உட்பட்ட உக்கடம் பேருந்து நிலையத்தில் ரூ.21.55 கோடி மதிப்பீட்டில் நடைபெற்று வரும் முனையம் 2 கட்டுமானப் பணிகளை மாநகராட்சி ஆணையாளர் கட்டா ரவி தேஜா நேரில் பார்வையிட்டு, பணிகளை துரிதப்படுத்தி பொதுமக்கள் பயன்பாட்டிற்கு கொண்டுவர சம்மந்தப்பட்ட அலுவலர்களுக்கு அறிவுறுத்தினார்.

கோயம்புத்தூர் மாநகராட்சி மத்திய மண்டலம், வார்டு எண்.82க்கு உட்பட்ட இந்த பேருந்து நிலையத்தில் நடைபெற்று வரும் பணிகளை ஆணையாளர் இன்று (01.10.2026) நேரில் பார்வையிட்டு ஆய்வு மேற்கொண்டார்.

அதனைத் தொடர்ந்து, மாநகராட்சி ஆணையாளர், தெற்கு மண்டலம் வார்டு எண்.99-க்குட்பட்ட வெள்ளலூர் குப்பைக் கிடங்கு வளாகத்தில் 15வது மத்திய நிதிக்குழு மானியம் (CFC) திட்டத்தின்கீழ் ரூ.46 இலட்சம் மதிப்பீட்டில் கட்டப்பட்டு வரும் வீடில்லா நாய்களின் கருத்தடை அறுவை சிகிச்சை மையத்தின் (ABC Centre) கட்டுமானப் பணிகளையும் நேரில் பார்வையிட்டு ஆய்வு மேற்கொண்டார். பணிகளை விரைவாக மேற்கொண்டு பயன்பாட்டிற்கு கொண்டுவர தேவையான நடவடிக்கைகள் மேற்கொள்ள அலுவலர்களுக்கு அறிவுறுத்தினார்.

மேலும், மாநகராட்சி ஆணையாளர், அதே குப்பைக் கிடங்கு வளாகத்தில் ரூ.58.54 கோடி மதிப்பீட்டில் அமைக்கப்பட்டு வரும் மக்கும் மற்றும் மக்காத குப்பை தரம் பிரிக்கும் மையத்தின் கட்டுமானப் பணிகளையும் நேரில் பார்வையிட்டு, பணிகளை விரைவாக மேற்கொண்டு பயன்பாட்டிற்கு கொண்டுவர அலுவலர்களுக்கு அறிவுறுத்தினார்.

இந்த ஆய்வுகளின் போது மாநகர தலைமைப் பொறியாளர் விஜயகுமார், செயற்பொறியாளர் ஜெகன், உதவி செயற்பொறியாளர்கள் சரவணக்குமார் மற்றும் கனகராஜ், உதவி பொறியாளர்கள் சதீஷ் மற்றும் சந்தீப்குமார், சுகாதார ஆய்வாளர்கள் தனபாலன் மற்றும் பாலகுமார் உள்ளிட்ட மாநகராட்சி அலுவலர்கள் பலர் உடனிருந்தனர்.