காந்தி ஜெயந்தி: சென்னை - போத்தனூர் சிறப்பு ரயில்கள் இயக்கம்; நாளை காலை 8 மணிக்கு முன்பதிவு

கோவை : காந்தி ஜெயந்தி வாரக்கடைசிவிடுமுறை நாட்களில் பயணிகள் நெரிசலை சமாளிக்கும் வகையில், சென்னை-போத்தனூர்மற்றும் எர்ணாகுளம்-சென்னை இடையே போத்தனூர் வழியாக சிறப்பு ரயில்களை தெற்கு ரயில்வே அறிவித்துள்ளது.

அதன்படி, ரயில் எண் 06023 டாக்டர் எம்.ஜி.ஆர். சென்னை சென்ட்ரல்-போத்தனூர் விரைவு சிறப்பு ரயில் அக்டோபர் 1 அன்று இரவு 11.55 மணிக்கு டாக்டர் எம்.ஜி.ஆர். சென்னை சென்ட்ரலில் இருந்து புறப்பட்டு, அக்டோபர் 2 அன்று காலை 9.15 மணிக்கு போத்தனூர் வந்தடையும். திரும்பும் சேவையான ரயில் எண் 06024 போத்தனூர்-சென்னை பீச் விரைவு சிறப்பு ரயில், அக்டோபர் 4 அன்று மாலை 6.15 மணிக்கு போத்தனூரில் இருந்து புறப்பட்டு, அக்டோபர் 5 அன்று அதிகாலை 4 மணிக்கு சென்னை பீச் வந்தடையும்.

பெரம்பூர், திருவள்ளூர், அரக்கோணம், காட்பாடி, ஜோலார்பேட்டை, சேலம், ஈரோடு மற்றும் திருப்பூர் ஆகிய நிலையங்களில் நிறுத்தப்பட்டு போத்தனூர் வந்தடையும் என்றும் இந்த ரயிலில் 10 ஏசி 3-tier பெட்டிகள், ஆறு ஏசி 3-tier economy பெட்டிகள் மற்றும் இரண்டு சரக்கு-பிரேக் வேன்கள் இணைக்கப்பட்டுள்ளன என்று தெரிவிக்கப்பட்டுள்ளது.

இதேபோல், ரயில் எண் 06056 எர்ணாகுளம் ஜங்ஷன்-சென்னை எழும்பூர் விரைவு சிறப்பு ரயில் அக்டோபர் 4 அன்று இரவு 11.10 மணிக்கு எர்ணாகுளம் ஜங்ஷனில் இருந்து புறப்பட்டு, மறுநாள் மதியம் 12.30 மணிக்கு சென்னை எழும்பூர் வந்தடையும். திரும்பும் சேவையான ரயில் எண் 06055 சென்னை எழும்பூர்-எர்ணாகுளம் ஜங்ஷன் விரைவு சிறப்பு ரயில், அக்டோபர் 5 அன்று மதியம் 2.30 மணிக்கு சென்னை எழும்பூரில் இருந்து புறப்பட்டு அதிகாலை 4.30 மணிக்கு எர்ணாகுளம் ஜங்ஷன் வந்தடையும்.

இந்த சேவை போத்தனூர், திருப்பூர், ஈரோடு, சேலம், ஜோலார்பேட்டை, காட்பாடி, அரக்கோணம், திருவள்ளூர் மற்றும் பெரம்பூர் உள்ளிட்ட நிலையங்களில் நிறுத்தப்படும். அதில், இரண்டு ஏசி 2-tier பெட்டிகள், மூன்று ஏசி 3-tier பெட்டிகள், ஏழு ஏசி 3-tier economy பெட்டிகள், நான்கு ஸ்லீப்பர் கிளாஸ் பெட்டிகள், நான்கு ஜெனரல் செகண்ட் கிளாஸ் பெட்டிகள் மற்றும் இரண்டு சரக்கு-பிரேக் வேன்கள் அடங்கும்.

தம்பரம்-தென்காசி/செங்கோட்டை, தம்பரம்-மானாமதுரை மற்றும் திருநெல்வேலி-தம்பரம் உள்ளிட்ட பிற பாதைகளிலும் காந்தி ஜெயந்தி நீண்ட விடுமுறை ஏற்பாடுகளின் ஒரு பகுதியாக தெற்கு ரயில்வே சிறப்பு சேவைகளை அறிவித்துள்ளது.