கோவை ஸ்ரீ ராமகிருஷ்ணா மகளிர் கல்லூரியில் சர்வதேச மாநாடு

Coimbatore: ஸ்ரீ ராமகிருஷ்ணா மகளிர் கல்லூரியின் வணிகவியல் துறை சார்பில் "உலகளாவிய விநியோகத் தொடர் மறுசீரமைப்பு - சீனா பிளஸ் ஒன் காலகட்டத்தில் இந்தியாவிற்கான வாய்ப்புகள்" என்ற தலைப்பில் இரண்டு நாள் சர்வதேச மாநாடு செப்டம்பர் 29, 30 ஆகிய தேதிகளில் நடைபெற்றது.

இந்திய உலக விவகாரக் குழுமம் (ICWA), புதுதில்லி வழங்கிய நிதியுதவியுடன், சீன ஆய்வுகளுக்கான சென்னை மையம் (C3S), சென்னை ஆகியவற்றுடன் இணைந்து இம்மாநாடு நடத்தப்பட்டது.

மாநாட்டின் தொடக்க நிகழ்வில் கல்லூரி முதல்வர் டாக்டர் கி. சித்ரா உரையாற்றினார். ICWA-வின் மூத்த ஆய்வறிஞர் டாக்டர் சஞ்சீவ் குமார், சிங்கப்பூர் தேசியப் பல்கலைக்கழகத்தின் டாக்டர் பி. எஸ். ஸ்ரீனிவாஸ், சிங்கப்பூர் மேலாண்மை மேம்பாட்டு நிறுவனத்தின் டாக்டர் டார்வின் ஜோசப் ஆகியோர் சிறப்புரையாற்றினர்.

உலகளாவிய பொருளாதார மாற்றங்கள், சீனா பிளஸ் ஒன் உத்தி, இந்தியாவின் போட்டித்திறன், தொழில்நுட்ப வளர்ச்சி, நிலையான விநியோகத் தொடர், குறு, சிறு மற்றும் நடுத்தரத் தொழில் நிறுவனங்கள் (MSME) மற்றும் தொடக்கநிலை நிறுவனங்களுக்கான வாய்ப்புகள் உள்ளிட்ட பல்வேறு முக்கிய அம்சங்கள் குறித்து வல்லுநர்கள் தங்களது கருத்துகளைப் பகிர்ந்துகொண்டனர்.

கல்வியாளர்கள், ஆய்வாளர்கள் மாநாட்டில் 34 நிறுவனங்களைச் சேர்ந்த 116 ஆய்வுக்கட்டுரைகள் சமர்ப்பிக்கப்பட்டன. மேலும் தொழில்துறை வல்லுநர்கள் பங்கேற்று, உலகளாவிய விநியோகத் தொடரில் இந்தியாவின் பங்களிப்பு மற்றும் எதிர்கால வாய்ப்புகள் குறித்து ஆக்கப்பூர்வமான கலந்துரையாடலில் ஈடுபட்டனர்.

மாறிவரும் உலகப் பொருளாதாரச் சூழலில் இந்தியாவின் தொழில்துறை வளர்ச்சி மற்றும் உலகளாவிய விநியோகத் தொடரில் இந்தியாவின் பங்களிப்பை வலுப்படுத்துவதற்கான வாய்ப்புகளை ஆராயும் முக்கிய தளமாக இம்மாநாடு அமைந்தது.