நவம்பர் 15-ல் கோவை வழியாகச் செல்லும் திருச்சி–பாலக்காடு விரைவு ரயில் வழக்கம்போல் இயக்கம்

Coimbatore: ஈரோடு–கரூர் ரயில் வழித்தடத்தில் நவம்பர் 15-ஆம் தேதி மேற்கொள்ளத் திட்டமிடப்பட்டிருந்த தண்டவாளப் பராமரிப்பு மற்றும் ஸ்லீப்பர் மாற்றுப் பணிகள் எதிர்பாராத காரணங்களால் ரத்து செய்யப்பட்டுள்ளன. இதையடுத்து, அன்றைய தினம் மூன்று விரைவு ரயில்களின் இயக்கத்தில் ஏற்கெனவே அறிவிக்கப்பட்டிருந்த மாற்றங்களை தெற்கு ரயில்வே திரும்பப் பெற்றுள்ளது.

நவம்பர் 15-ஆம் தேதி நடைபெறவிருந்த பொறியியல் பணிகளைக் கருத்தில் கொண்டு, மூன்று ரயில்களின் இயக்கத்தில் மாற்றங்கள் அறிவிக்கப்பட்டிருந்தன. தற்போது அந்தப் பணிகள் ரத்து செய்யப்பட்டுள்ளதால், மூன்று ரயில்களும் எவ்வித மாற்றமுமின்றி வழக்கமான கால அட்டவணைப்படி இயக்கப்படும் என அறிவிக்கப்பட்டுள்ளது.

அதன்படி, கோவை வழியாகச் செல்லும் ரயில் எண் 16843 திருச்சிராப்பள்ளி சந்திப்பு–பாலக்காடு டவுன் விரைவு ரயில், நவம்பர் 15-ஆம் தேதி வழக்கம்போல் பாலக்காடு டவுன் வரை இயக்கப்படும். பிற்பகல் 1 மணிக்குத் திருச்சிராப்பள்ளி சந்திப்பில் இருந்து புறப்படவுள்ள இந்த ரயில், கரூர் சந்திப்புடன் நிறுத்தப்படாது.

இதேபோல், ரயில் எண் 16846 செங்கோட்டை–ஈரோடு விரைவு ரயில் கரூர் சந்திப்புடன் நிறுத்தப்படாமல் ஈரோடு சந்திப்பு வரை இயக்கப்படும். மேலும், ரயில் எண் 16845 ஈரோடு–செங்கோட்டை விரைவு ரயிலும் கொடுமுடி ரயில் நிலையத்தில் கட்டுப்படுத்தப்படாமல் வழக்கம்போல் இயக்கப்படும்.

இதற்கான அறிவிப்பை தெற்கு ரயில்வேயின் சேலம் கோட்டம் வெள்ளிக்கிழமை வெளியிட்ட செய்திக்குறிப்பில் தெரிவித்துள்ளது.