கோவை மாநகராட்சி: தீபாவளி விடுமுறையில் கர்ப்பிணிகளுக்கு 'ஹாலிடே கால்ஸ்' திட்டம் மூலம் பாதுகாப்பு

Coimbatore: கோவை மாநகராட்சிக்கு உட்பட்ட பகுதிகளில் உள்ள கர்ப்பிணிகள் தீபாவளி விடுமுறைக்கு வெளியூர் சென்றபோது அவர்களை தொலைபேசி மூலம் கண்காணித்து உதவிய 'ஹாலிடே கால்ஸ்' திட்டம் வெற்றிகரமாக செயல்படுத்தப்பட்டது.

கோயம்புத்தூர் மாநகராட்சிக்கு உட்பட்ட பகுதிகளில் உள்ள கர்ப்பிணிகள் விடுமுறைக்கு வெளியூர் சென்றால் அவர்களை தொலைபேசி மூலம் கண்காணிக்க முடிவு செய்யப்பட்டு இந்த ஆண்டு விநாயகர் சதுர்த்தி முதல் துவங்கி ஆயுத பூஜை, விஜய தசமி அரசு விடுமுறை நாட்களில் மாநகராட்சியில் உள்ள 33 நகர்ப்புற ஆரம்ப சுகாதார நிலையங்கள் மூலமாக இந்த திட்டம் செயல்படுத்தப்பட்டு வருகிறது.

கோயம்புத்தூர் மாநகராட்சி முழுவதும் 10,092 கர்ப்பிணிகள் மருத்துவ பரிசோதனைகளை முறையாக மேற்கொண்டு வருகின்றனர். வருகின்ற தீபாவளி பண்டிகையை முன்னிட்டு தொடர் அரசு விடுமுறை நாட்கள் வந்ததையொட்டி கர்ப்பிணிகள் பலர் தங்களது சொந்த ஊருக்கு செல்ல நேரிடும் என்பதால் 33 நகர்ப்புற ஆரம்ப சுகாதார நிலையங்களில் உள்ள செவிலியர்கள் தொலைபேசி மூலம் அவர்களை கண்காணிக்க 2026 நவம்பர் 6 முதல் நவம்பர் 10 வரை 5 நாட்கள் 'ஹாலிடே கால்ஸ்' திட்டம் செயல்படுத்தப்பட்டது.

இதில் குறிப்பாக 2026 அக்டோபர், நவம்பர், டிசம்பர், 2027 ஜனவரி மற்றும் பிப்ரவரி மாதங்களில் பிரசவிக்கவுள்ள 6,616 கர்ப்பிணிகளுக்கு கூடுதல் கவனம் செலுத்தி அவர்களை கண்காணிக்க திட்டமிடப்பட்டு, கடந்த நவம்பர் 6 முதல் 10 வரை 5 நாட்களில் 6,317 கர்ப்பிணிகள் செவிலியர்கள் மூலமாக தொலைபேசி வாயிலாக தொடர்பு கொள்ளப்பட்டனர். அதில், கோயம்புத்தூர் அரசு மருத்துவக்கல்லூரி மருத்துவமனை, அறந்தாங்கி, திருநெல்வேலி, பாண்டிச்சேரி, திண்டுக்கல், மதுரை, இராமநாதபுரம், திருச்செந்தூர் மற்றும் கேரளா உள்ளிட்ட பகுதிகளுக்கு சென்றிருந்த 94 கர்ப்பிணிகள் பிரசவத்திற்கு அனுமதிக்கப்பட்டுள்ளனர்.

மேலும், 399 கர்ப்பிணிகள் வெளி மாவட்டங்களுக்கும், 58 கர்ப்பிணிகள் கேரளா, கர்நாடகா, மேற்கு வங்காளம், உத்திரபிரதேசம், பீகார், அசாம், இராஜஸ்தான், நேபாளம் மற்றும் ஒரிசா போன்ற வெளிமாநிலங்களுக்கும், 1 கர்ப்பிணி கம்போடியா எனும் வெளிநாட்டுக்கும் சென்றிருந்தது குறிப்பிடத்தக்கது. இவர்களுக்கு முறையான மருத்துவ ஆலோசனைகள் வழங்கப்பட்டதன் மூலமாக அனைவரும் நலமுடன் இருப்பது உறுதி செய்யப்பட்டது.

இதுபோல வரும் டிசம்பர், ஜனவரி மாதங்களில் வருகின்ற விடுமுறை நாட்களில் 'ஹாலிடே கால்ஸ்' தொடர்ந்து செயல்படுத்தப்படும் என மாநகராட்சி சார்பில் தெரிவிக்கப்பட்டுள்ளது.