கோவையில் தீபாவளிக்குப் பிறகு மாநகராட்சி சார்பில் 857 டன் குப்பைகள் அகற்றம்

Coimbatore: தீபாவளி பண்டிகையையொட்டி, கோயம்புத்தூர் மாநகராட்சிக்கு உட்பட்ட பகுதிகளில் இதுவரை 857 டன் குப்பைகள் அகற்றப்பட்டு, தூய்மைப் பணிகள் மேற்கொள்ளப்பட்டு வருகின்றன.

ஒவ்வொரு ஆண்டும் தீபாவளி பண்டிகை முன்னிட்டு, கோயம்புத்தூர் மாநகராட்சிக்கு உட்பட்ட பகுதிகளில் சேகரமாகும் குப்பைகள் மற்றும் கழிவுகள் அகற்றும் பணிகள் மேற்கொள்ளப்படும் வழக்கம் இருந்து வருகிறது. அந்த வகையில் இந்த ஆண்டு, தீபாவளிப் பண்டிகையையொட்டி (08.11.2026) கோயம்புத்தூர் மாநகராட்சிக்கு உட்பட்ட ஐந்து மண்டலங்களில், சாலை ஓரங்கள் மற்றும் இதர பகுதிகளிலுள்ள பட்டாசு குப்பைகள் மற்றும் கழிவுகள் அகற்றும் பணியானது, 09.11.2026 அன்று காலை முதல் தூய்மை பணியாளர்களைக் கொண்டு நடைபெற்று வந்தது.

கோயம்புத்தூர் மாநகராட்சியின் 5 மண்டலங்களுக்கு உட்பட்ட 100 வார்டு பகுதிகளில், இதுவரை சுமார் 106 டன் பட்டாசு கழிவுகள் உள்ளிட்டு மொத்தம் 857 டன் குப்பைகள், இன்று பிற்பகல் 1 மணி நிலவரப்படி அகற்றப்பட்டு, தூய்மைப் பணிகள் மேற்கொள்ளப்பட்டு வருகிறது. இப்பணியில், காலை முதல் சுமார் 1,862 தூய்மைப் பணியாளர்கள் ஈடுபட்டு வருகின்றனர். மேலும், லாரி, இலகுரக வாகனங்கள் உள்ளிட்ட 371 எண்ணிக்கையிலான வாகனங்கள் பயன்படுத்தப்பட்டு தூய்மைப் பணிகள் மேற்கொள்ளப்படுகின்றன.

இப்பணிகளை சம்மந்தப்பட்ட உதவி ஆணையர்கள் கள ஆய்வு செய்யவும், துணை ஆணையாளர்கள் கண்காணிப்பு பணிகளை மேற்கொள்ளவும் மாநகராட்சி ஆணையாளர் கட்டா ரவி தேஜா தெரிவித்துள்ளார்.

இந்த தூய்மைப் பணியானது இன்று மாலைக்குள் முடியும் வகையில் திட்டமிடப்பட்டு துரிதமாக நடைபெற்று வருகிறது என மாநகராட்சி சார்பில் தெரிவிக்கப்பட்டுள்ளது.