கோவை மேற்கு, மத்திய மண்டலங்களில் வளர்ச்சிப் பணிகளை ஆய்வு செய்த மாநகராட்சி ஆணையாளர்

Coimbatore: கோவை மாநகராட்சி, மேற்கு மற்றும் மத்திய மண்டலங்களுக்கு உட்பட்ட பகுதிகளில் நடைபெற்றுவரும் வளர்ச்சித்திட்டப் பணிகளை மாநகராட்சி ஆணையாளர் கட்டா ரவி தேஜா நேரில் பார்வையிட்டு ஆய்வு மேற்கொண்டார். கட்டுமானப் பணிகளை விரைவாக மேற்கொள்ள சம்மந்தப்பட்ட அலுவலர்களுக்கு அவர் அறிவுறுத்தினார்.

கோயம்புத்தூர் மாநகராட்சி, மேற்கு மண்டலம், வார்டு எண்.33க்குட்பட்ட கவுண்டம்பாளையம் பகுதியிலுள்ள குப்பை மாற்று நிலையத்தின் (பயோ மைனிங்) செயல்பாடுகள் குறித்து அலுவலர்களிடம் கேட்டறிந்த ஆணையாளர், குப்பைகளை தரம் பிரிக்கும் பணிகளை துரிதப்படுத்திட சம்மந்தப்பட்ட அலுவலர்களுக்கு அறிவுறுத்தினார்.

அதனைத் தொடர்ந்து, வார்டு எண்.45க்கு உட்பட்ட மேட்டுப்பாளையம் பிரதான சாலை, எம்.ஜி.ஆர். மார்க்கெட் நுழைவாயிலில் உள்ள பழைய கல்வெட்டினை அகற்றி, புதிய கல்வெட்டு அமைப்பதற்கான நடைபெற்றுவரும் பணிகளையும் ரவி தேஜா பார்வையிட்டார். கவுண்டம்பாளையம் ஜீவா நகர் பகுதியில் மாநகராட்சியின் சார்பில் ரூ.9.90 கோடி மதிப்பீட்டில் சுமார் 110 ஏக்கர் பரப்பளவில் மாற்றுத்திறனாளிகளுக்கான (பாரா ஒலிம்பிக்) விளையாட்டு வீரர் மற்றும் வீராங்கனைகள் பங்கேற்கும் வகையில் உலகத்தரம் வாய்ந்த பாரா ஒலிம்பிக் பல் உள்விளையாட்டு வளாகத்தின் கட்டுமானப் பணிகளையும், அதே பகுதியில் நடைபெற்றுவரும் கழிவுநீர் சுத்திகரிப்பு நிலையத்தின் கட்டுமானப் பணிகளையும் நேரில் சென்று பார்வையிட்டு, பணிகளை விரைவாக மேற்கொள்ள சம்மந்தப்பட்ட அலுவலர்களுக்கு அறிவுறுத்தினார்.

மேலும், மத்திய மண்டலம், வார்டு எண்.69க்குட்பட்ட மேட்டுப்பாளையம் சாலையில் உள்ள அண்ணா மார்க்கெட்டில் நடைபெற்றுவரும் கட்டுமானப் பணிகளையும் மற்றும் சாய்பாபா காலனியில் மேம்பாலம் கீழ் பகுதியில் நடைபெற்றுவரும் பாதாள சாக்கடை திட்டப்பணிகளையும் ஆணையாளர் நேரில் பார்வையிட்டார். பாதாள சாக்கடைத் திட்டப்பணிகள் நிறைவுபெற்ற இடங்களில், தார் சாலைப் பணிகளை விரைவாக மேற்கொள்ள சம்மந்தப்பட்ட அலுவலர்களுக்கு அவர் அறிவுறுத்தினார்.

இந்த ஆய்வுகளின்போது, மாநகர தலைமைப் பொறியாளர் விஜயகுமார், உதவி ஆணையர் நர்மதா, செயற்பொறியாளர் ஜெகன், உதவி செயற்பொறியாளர்கள் சவிதா, சரவணக்குமார் (பொ), மண்டல சுகாதார அலுவலர் இராதாகிருஷ்ணன், உதவி பொறியாளர் கார்த்திகேயன் (பொ), சுகாதார ஆய்வாளர் ராஜேந்திரன் மற்றும் மாநகராட்சி அலுவலர்கள் உட்பட பலர் உடனிருந்தனர்.