கோவையில் மாநகராட்சி சார்பில் மழைக்கால மருத்துவ முகாம்கள்: 8 நாட்களில் 15,328 பேர் பயன்பெற்றனர்

Coimbatore: கோவை மாநகராட்சிக்கு உட்பட்ட பகுதிகளில் அண்மையில் பெய்த வடகிழக்கு பருவமழையை தொடர்ந்து கடந்த 8 நாட்களில் நடத்தப்பட்ட 264 சிறப்பு மருத்துவ முகாம்கள் மூலம் 15,328 நபர்கள் பயனடைந்துள்ளனர் என மாநகராட்சி சார்பில் தெரிவிக்கப்பட்டுள்ளது.

கோவை மாநகராட்சிக்கு உட்பட்ட பகுதிகளில் அண்மையில் பெய்த கனமழையினால் தேங்கிய மழைநீர் போர்கால அடிப்படையில் அகற்றப்பட்டது. அந்த இடங்களில் மாநகராட்சி பொது சுகாதார துறையின் சார்பில், வடகிழக்கு பருவமழை சிறப்பு மருத்துவ முகாம் கடந்த 23.10.2026 முதல் நாளதுவரை (28.10.2026) பல்வேறு இடங்களில் நடைபெற்றது.

இந்த முகாம்களில் 11,021 நபருக்கு ஒ.ஆர்.எஸ். குடிநீர், கபசுர குடிநீர் விநியோகிக்கப்பட்டது என்பது குறிப்பிடத்தக்கது. இதுநாள் வரை நடைபெற்ற 264 சிறப்பு முகாம்களில் இன்று வரை 15,328 நபர்கள் பங்கேற்று பயனடைந்தனர். இதில், 49 நபர்களுக்கு காய்ச்சல் கண்டறியப்பட்டு இரத்த பரிசோதனை மேற்கொள்ள அரசு மருத்துவ நிலையங்களுக்கு அனுப்பி வைக்கப்பட்டனர்.

கோயம்புத்தூர் மாநகராட்சிக்கு உட்பட்ட 33 நகர்ப்புற ஆரம்ப சுகாதார நிலையங்களின் மருத்துவர்கள், செவிலியர்கள், மருத்துவத்துறை பணியாளர்கள் மழைநீர் தேங்கி அகற்றப்பட்ட பகுதிகளில் மழைக்கால தொற்றுநோய்களை தடுக்கும் முன்னெச்சரிக்கை நடவடிக்கையாக அப்பகுதிகளுக்கு நேரடியாக சென்று, அங்கு வசிக்கும் பொதுமக்களுக்கு காய்ச்சல் உள்ளிட்ட உடல்நலக்குறைவு ஏதேனும் ஏற்பட்டுள்ளதா என்பதனை பரிசோதித்து உரிய மருந்து மாத்திரைகள் வழங்கினர். தேவைப்பட்டவர்களுக்கு இரத்த பரிசோதனை உள்ளிட்ட மேல்சிகிச்சைக்காக அரசு மருத்துவமனை நிலையங்களுக்கு பரிந்துரை செய்து அனுப்பி வைக்கப்பட்டது.

இதன் மூலமாக பொதுமக்களுக்கு நீரினால் பரவக்கூடிய மழைக்கால தொற்றுநோய்களான வயிற்றுப்போக்கு, டைப்பாய்டு, மஞ்சள் காமாலை, எலி காய்ச்சல் உள்ளிட்டவை ஏற்படாதவாறு அப்பகுதிகளில் பொதுமக்கள் கொதிக்க வைத்து ஆற வைத்த தண்ணீர் மட்டுமே குடிக்கவேண்டும் என்று விழிப்புணர்வு தடுப்பு நடவடிக்கைகள் மேற்கொள்ளப்பட்டது.

சுகாதாரப்பணியாளர்களால் மேலும், அப்பகுதிகளில் சுகாதார ஆய்வாளர்கள் குடிநீரில் குளோரின் அளவை பரிசோதித்து பாதுகாப்பான குடிநீர் என்பதனை உறுதி செய்தனர். அதேபோல், அப்பகுதிகளில் மாநகராட்சி கூட்டுத்தூய்மைப்பணி மேற்கொள்ளப்பட்டு கிருமி நாசினி தெளிக்கப்பட்டது. பொதுமக்கள் நலன் கருதி இந்த சிறப்பு மருத்துவ முகாம்கள் மேலும் 5 நாட்களுக்கு நடைபெறவுள்ளது.

33 நகர்ப்புற ஆரம்ப சுகாதார நிலையங்களின் சார்பாக கோயம்புத்தூர் மாநகராட்சிக்கு உட்பட்ட பகுதிகளில் தொடர்ந்து நடைபெறவுள்ளதால் பொதுமக்கள் பங்கேற்று பயன்பெறுமாறு மாநகராட்சி ஆணையாளர் கட்டா ரவி தேஜா தெரிவித்துள்ளார்.