கோவை மாநகராட்சியின் ‘அதிரடி சரவெடி’ டெங்கு தடுப்புப் பணி: 2.09 லட்சம் தேவையற்ற பொருட்கள் அகற்றம்

Coimbatore: கோயம்புத்தூர் மாநகராட்சி பகுதியில் கடந்த 2 நாட்களில் டெங்கு தடுப்பு கூட்டுத்தூய்மைப்பணி போட்டியின் மூலம் 2,09,647 தேவையற்ற கலன்கள் சேகரிக்கப்பட்டு அகற்றப்பட்டுள்ளன.

கோயம்புத்தூர் மாநகராட்சி ஆணையாளர் கட்டா ரவி தேஜா இ.ஆ.ப அவர்களின் அறிவுறுத்தலின்படி, மாநகராட்சிக்கு உட்பட்ட 5 மண்டலங்களிலும் உள்ள 100 வார்டுகளிலும் டெங்கு தடுப்பு நடவடிக்கைகள் தீவிரமாக மேற்கொள்ளப்பட்டு வருகின்றன. மக்கள் பங்கேற்புடன் நடத்தப்படும் தொடர் டெங்கு தடுப்பு விழிப்புணர்வு நிகழ்ச்சிகளால் மாநகராட்சிக்கு உட்பட்ட பகுதிகளில் டெங்கு காய்ச்சல் வெகுவாக கட்டுப்படுத்தப்பட்டுள்ளது.

அண்மையில் பெய்த கனமழையின் காரணமாக நன்னீர் தேங்கி ஏடீஸ் கொசுப்புழு பெருகுவதற்கு வாய்ப்பு இருப்பதால், மாநகராட்சிக்கு உட்பட்ட 5 மண்டலங்களுக்கு இடையே அதிரடி சரவெடி டெங்கு தடுப்பு கூட்டுத்தூய்மைப்பணி போட்டி நேற்று முதல் நடைபெற்று வருகிறது. இதில் டயர், டப்பா, தேங்காய் சிரட்டை, உடைந்த ஜாடி, தேங்காய் ஓடுகள், உடைந்த பானைகள், பயன்படுத்தாத பாட்டில்கள், ப்ளு பேரல் டிரம்கள், டீ கப்புகள், பிளாஸ்டிக் உணவு பெட்டிகள் உள்ளிட்ட கலன்களை கண்டறிந்து அகற்றும்பணி மூலம் கடந்த 2 நாட்களில் 5 மண்டலங்களில் இருந்தும் 2,09,647 கலன்கள் சேகரிக்கப்பட்டு அகற்றப்பட்டன.

கோயம்புத்தூர் மாநகராட்சி மேற்கு மண்டலம், ஆர்.எஸ்.புரம், சாஸ்திரி மைதானத்தில் சேகரிக்கப்பட்டு பிரித்து குவியலாக வைக்கப்பட்டிருந்த தேவையற்ற கலன்களை ஆணையாளர் கட்டா ரவி தேஜா நேரில் பார்வையிட்டு அவற்றை முறையாக அகற்றும்படி அறிவுறுத்தினார். மேலும், இன்று கிழக்கு மண்டலம் முழுவதும் டயர்கள் அகற்றும் சிறப்புப்பணி மேற்கொள்ளப்பட்டதில் 3,000 எண்ணிக்கையிலான டயர்கள் கண்டறியப்பட்டு லாரிகள் மூலம் அகற்றப்பட்டன. இதே போல 5 மண்டலங்களிலும் டயர்கள் அகற்றும் சிறப்பு பணி மேற்கொள்ளப்பட்டதோடு, வாகன பழுதுநீக்கும் கடைகளில் உருவான தேவையற்ற உதிரிபாகங்கள் மற்றும் பழைய பொருட்கள் சேகரித்து விற்பனை செய்யும் கடைகளிலும் ஆய்வு மேற்கொள்ளப்பட்டு தேவையற்ற பொருட்கள் அப்புறப்படுத்தப்பட்டன.

வாரந்தோறும் மாநகராட்சி பகுதிகளில் சனிக்கிழமைகளில் நடத்தப்பட்டுவரும் டெங்கு விழிப்புணர்வு வீதி நிகழ்ச்சிகள் 5 மண்டலங்களிலும் இன்று (24.10.2026) நடைபெற்றது. இதில் மேற்கு மண்டலத்திற்கு உட்பட்ட 33-வது வார்டில் பி&டி காலனியில் நடைபெற்ற டெங்கு விழிப்புணர்வு வீதி நிகழ்ச்சியில் நதியா, கல்யாணி, நாகராணி, வீரமணி, ரத்தினம் வடுகரசி உள்ளிட்ட தூய்மைப்பணியாளர்கள் டெங்கு தடுப்பு கூட்டுத்தூய்மைப்பணியில் சிறப்பாக பணியாற்றியதற்காக அப்பகுதி பொதுமக்கள் சால்வை அணிவித்து பாராட்டினர்.

மக்கள் பங்களிப்பைத் தருவோம் டெங்குவை ஒழிப்போம் என்ற கையெழுத்து பலகையில் பொதுமக்கள் ஆர்வமுடன் கையெழுத்து இட்டனர். கொசு ஒழிப்பு புகை மருந்து அடிக்கும் இயந்திரங்கள், டெங்கு கொசு உற்பத்தியாகும் கலன்கள் கொசு வடிவில் காட்சிப்படுத்தப்பட்டு பொதுமக்களின் பார்வைக்கு வைக்கப்பட்டிருந்தது. இப்பகுதியில் இளைஞர்கள், சிறுவர்கள், சிறுமியர்கள், மகளிர் உள்ளிட்ட அனைவரும் டெங்கு விழிப்புணர்வு கோலப்போட்டியில் கலந்துகொண்டு வண்ணக் கோலங்கள் வரைந்து, மக்கள் பங்களிப்பை தருவோம் டெங்குவை ஒழிப்போம் என்று உறுதிமொழி ஏற்றனர்.

இந்நிகழ்வுகளின்போது, நகர் நல அலுவலர் சுபாஷ் காந்தி, மண்டல சுகாதார அலுவலர் ராதாகிருஷ்ணன் மற்றும் மாநகராட்சி அலுவலர்கள், பணியாளர்கள் உட்பட பலர் கலந்து கொண்டனர்.