கோவை மேற்கு மண்டலத்தில் நுண்ணுயிர் உரம், மழைநீர் சேகரிப்பு பணிகளை ஆய்வு செய்த மாநகராட்சி ஆணையாளர்

Coimbatore: கோவை மாநகராட்சி, மேற்கு மண்டலத்திற்கு உட்பட்ட பகுதிகளில் அமைந்துள்ள நுண்ணுயிர் உரம் தயாரிக்கும் மற்றும் மறுசுழற்சி செய்யும் மையங்களையும், நடைபெற்றுவரும் மழைநீர் சேகரிப்பு கட்டமைப்புப் பணிகளையும் மாநகராட்சி ஆணையாளர் கட்டா ரவி தேஜா, இன்று (14.10.2026) நேரில் பார்வையிட்டு ஆய்வு மேற்கொண்டார்.

கோயம்புத்தூர் மாநகராட்சி, மேற்கு மண்டலம், வார்டு எண்.74க்கு உட்பட்ட பனைமரத்தூர் மற்றும் வார்டு எண்.72க்கு உட்பட்ட ஆர்.எஸ்.புரம், சர் சண்முகம் சாலை ஆகிய பகுதிகளில் உள்ள மக்காத குப்பைகளை தரம் பிரித்து மறுசுழற்சி செய்யும் (MRF-Material Recovery Facility) மையங்களையும் அவர் பார்வையிட்டார்.

அதே போன்று, வார்டு எண்.72க்கு உட்பட்ட ஆர்.எஸ்.புரம், மேற்கு ஆரோக்கியசாமி சாலையில் உள்ள இசைக்கல்லூரி வளாகம், ஹாக்கி மைதானம் வாழைக்காய் மண்டி வளாகம், வார்டு எண்.71க்கு உட்பட்ட கெளலிபிரவுன் சாலையில் உள்ள உழவர்சந்தை வளாகம் ஆகிய பகுதிகளிலுள்ள நுண்ணுயிர் உரம் தயாரிக்கும் (Micro Composting Centre) மையங்களின் செயல்பாடுகளையும் ஆணையாளர் நேரில் பார்வையிட்டு ஆய்வு மேற்கொண்டார்.

அதனைத் தொடர்ந்து, வார்டு எண்.38க்குட்பட்ட ஓணாப்பாளையம் மற்றும் மருதமலை சாலை, IOB காலனி, திரு.வி.க.நகர் ஆகிய பகுதிகளிலுள்ள நுண்ணுயிர் உரம் தயாரிக்கும் மையங்களை (Micro Composting Centre) முழு செயல்பாட்டிற்கு கொண்டுவர சம்மந்தப்பட்ட அலுவலர்களுக்கு கட்டா ரவி தேஜா அறிவுறுத்தினார்.

மேலும், வார்டு எண்.38க்குட்பட்ட மருதமலை சாலை, பொம்மனாம்பாளையம் பிரிவில் நடைபெற்றுவரும் மழைநீர் சேகரிப்பு கட்டமைப்பு பணிகளையும், வார்டு எண்.36க்குட்பட்ட மருதமலை சாலை, முல்லை நகர் பகுதியில் நடைபெற்றுவரும் மழைநீர் வடிகால் கட்டுமானப் பணிகளையும் அவர் நேரில் பார்வையிட்டு, பணிகளை விரைவாக மேற்கொள்ள அலுவலர்களுக்கு அறிவுறுத்தினார்.

இந்த ஆய்வுகளின் போது, உதவி ஆணையர் நர்மதா, செயற்பொறியாளர் ஜெகன், உதவி செயற்பொறியாளர் சவிதா, மண்டல சுகாதார அலுவலர் இராதாகிருஷ்ணன், உதவி பொறியாளர் விமலா, சுகாதார ஆய்வாளர்கள் ரமேஷ், பார்கவி மற்றும் மாநகராட்சி அலுவலர்கள் உட்பட பலர் உடனிருந்தனர்.