கோவையில் ஐந்து மண்டலங்களிலும் டெங்கு விழிப்புணர்வு வீதி நிகழ்ச்சிகள்

Coimbatore: கோயம்புத்தூர் மாநகராட்சியின் ஐந்து மண்டலங்களுக்கு உட்பட்ட பகுதிகளில் டெங்கு விழிப்புணர்வு வீதி என்ற தலைப்பில், டெங்கு தடுப்பு குறித்த விழிப்புணர்வு நிகழ்ச்சிகள் நடைபெற்றன. இந்நிகழ்ச்சிகளை தமிழ்நாடு அரசு பொது சுகாதாரத் துறையின் இணை இயக்குநர் (நோய் தடுப்பு) மரு.செந்தில்குமார் பார்வையிட்டு, மாநகராட்சி அலுவலர்களை பாராட்டினார்.

கோயம்புத்தூர் மாநகராட்சி, மத்திய மண்டலம் வார்டு எண்.48-க்கு உட்பட்ட மந்திரியப்பன் வீதியில் நடைபெற்ற டெங்கு தடுப்பு விழிப்புணர்வு நிகழ்ச்சியில், செந்தில்குமார் விழிப்புணர்வு பணிகளை தொடங்கி வைத்தார். கொசு ஒழிப்பு புகை மருந்து அடிக்கும் இயந்திரங்கள், டெங்கு கொசு உற்பத்தியாகும் டயர்கள், பிளாஸ்டிக் பொருட்கள், தேங்காய் ஓடுகள் உள்ளிட்ட பொருட்கள் காட்சிப்படுத்தப்பட்டு, பொதுமக்களின் பார்வைக்கு வைக்கப்பட்டிருந்ததை அவர் பார்வையிட்டார்.

இந்நிகழ்ச்சியில், இளைஞர்கள், சிறுவர்கள், சிறுமிகள், மகளிர்கள் உள்ளிட்ட அனைவரும் டெங்கு குறித்த விழிப்புணர்வு கோலப்போட்டியில் கலந்து கொண்டு விழிப்புணர்வு ஏற்படுத்தினார்கள். மூத்த குடிமக்கள் தாமாக முன்வந்து டெங்கு விழிப்புணர்வு துண்டு பிரசுரங்களை வீடு தோறும் வழங்கினார்கள். இப்பகுதியில் நடமாடும் மருத்துவ குழுவினர் மூலம் காய்ச்சல் கண்டறியும் முகாம் நடத்தப்பட்டு, பொதுமக்களுக்கு நிலவேம்பு குடிநீர் விநியோகம் செய்யப்பட்டது.

அதேபோல், கோயம்புத்தூர் மாநகராட்சிக்கு உட்பட்ட வடக்கு மண்டலம் ஸ்ரீனிவாசன் நகரிலும், மேற்கு மண்டலம் மேற்கு இராமலிங்கம் ரோடு பகுதியிலும், தெற்கு மண்டலம் உப்பிலியர் திட்டு பகுதியிலும், கிழக்கு மண்டலம் நீலிகோணாம்பாளையம் மாரியம்மன் கோவில் வீதியிலும் இன்று டெங்கு தடுப்பு குறித்த விழிப்புணர்வு நிகழ்ச்சி நடைபெற்றது.

முன்னதாக, செந்தில்குமார், டெங்கு விழிப்புணர்வு செல்பி பாயிண்டில் புகைப்படம் எடுத்துக் கொண்டு, டெங்கு தடுப்பு விழிப்புணர்வு குறும்படத்தினை பார்வையிட்டு, மக்கள் பங்களிப்பைத் தருவோம் டெங்குவை ஒழிப்போம் என்ற கையெழுத்து இயக்கத்தில் கையெழுத்து இட்டு, விழிப்புணர்வு பணிகளை மேற்கொண்டார்.

தொடர்ந்து, இந்நிகழ்வின் நினைவாக மரக்கன்றுகள் நடவு செய்த பின்பு, சுகாதார உறுதிமொழியினை (டெங்கு விழிப்புணர்வு) மாநகராட்சி அலுவலர்கள், கொசு ஒழிப்பு பணியாளர்கள், மாநகராட்சி பள்ளியைச் சேர்ந்த மாணவ, மாணவிகள் மற்றும் பொதுமக்கள் உள்ளிட்ட அனைவரும் ஏற்றுக்கொண்டனர். இறுதியாக, இன்று நடைபெற்ற டெங்கு தடுப்பு குறித்த விழிப்புணர்வு நிகழ்ச்சியில், சிறப்பாக ரங்கோலி வரைந்தமைக்காக பொதுமக்களுக்கு பரிசுகள் வழங்கப்பட்டது.

மேலும், இதுபோன்று ஒவ்வொரு வாரமும் சனிக்கிழமை அன்று 5 மண்டலங்களிலும் 6,959 வீதிகளிலும் டெங்கு விழிப்புணர்வு வீதி என்ற தலைப்பில் தொடர் விழிப்புணர்வு நிகழ்ச்சிகள் நடைபெறும். இதில் பொதுமக்கள் ஆர்வமுடன் பங்கெடுத்து டெங்குவை ஒழிப்பதற்கு முன்வர வேண்டும் என மாநகராட்சி சார்பில் தெரிவிக்கப்பட்டுள்ளது.

இந்நிகழ்ச்சியின்போது, நகர் நல அலுவலர் மரு.சுபாஷ்காந்தி, உதவி ஆணையர் கணேசன், 48-வது வார்டு மாமன்ற உறுப்பினர் பிரபா ரவீந்திரன், மண்டல சுகாதார அலுவலர் குணசேகரன், சுகாதார ஆய்வாளர்கள் சரவணக்குமார், ஜெகநாதன், மாநகராட்சி பள்ளி மாணவ, மாணவியர்கள் மற்றும் மாநகராட்சி அலுவலர்கள் உட்பட பலர் கலந்து கொண்டனர்.