Coimbatore: கோயம்புத்தூர் மாநகராட்சி மத்திய மண்டலத்திற்கு உட்பட்ட வாலாங்குளம் மற்றும் உக்கடம் பெரியகுளத்தில், மாநகராட்சி ஆணையாளர் கட்டா ரவி தேஜா, குளங்களின் பராமரிப்பு பணிகள் தொடர்பாக இன்று (08.10.2026) ஆய்வு மேற்கொண்டார்.
கோயம்புத்தூர் மாநகராட்சியின் மத்திய மண்டலத்திற்கு உட்பட்ட பெரியகுளம் மற்றும் வாலாங்குளம் ஆகிய குளங்களில் பராமரிப்பு பணிகள் தொடர்பாக ஆணையாளர் ஆய்வு மேற்கொண்ட போது, குளங்களில் பொருத்தப்பட்டுள்ள அனைத்து சிசிடிவி கேமராக்களும் செயல்பாட்டில் உள்ளதா என்பதை ஆய்வு செய்து, பழுதுகள் ஏதேனும் இருந்தால் அதனை சரி செய்ய வேண்டும் என அறிவுறுத்தினார்.
குளங்களைச் சுற்றி நடைபாதைகளுக்காக அமைக்கப்பட்ட இடங்களில் உள்ள குப்பைகளை உரிய முறையில் அகற்றிடவும், தெருவிளக்குகள் சரியாக எரிகிறதா என்பதை ஆய்வு செய்து, பழுதுகள் ஏதேனும் இருப்பின் விரைவாக சரிசெய்து தர வேண்டும் எனவும் சம்மந்தப்பட்ட அலுவலர்களுக்கு அவர் அறிவுறுத்தினார்.
மேலும், ஒவ்வொரு குளத்திலிருந்தும் எடுக்கப்படும் குப்பைகளை முறையாக அகற்றுவது தொடர்பாகவும், தினந்தோறும் சேகரமாகும் குப்பைகளை சம்மந்தப்பட்ட சுகாதார அலுவலர்கள் மற்றும் ஆய்வாளர்கள் மூலம் அகற்ற வேண்டும் எனவும், பசுமையாக பராமரிக்க தேவையான நடவடிக்கைகளை மேற்கொள்ள வேண்டும் எனவும் ஆணையாளர் கூறினார். தேவையான இடங்களில் கூடுதலாக குடிநீர் வசதிகள் மற்றும் கழிப்பறை வசதிகளை மேற்கொள்ள வேண்டும் எனவும், சிறிய அளவிலான பராமரிப்பு பணிகள் மற்றும் வர்ணம் பூசும் பணிகளை ஒப்பந்ததார் மூலமாக மேற்கொள்ள வேண்டும் எனவும் அவர் அறிவுறுத்தினார்.
இந்த ஆய்வுகளின் போது, செயற்பொறியாளர் ஜெகன், உதவி செயற்பொறியாளர்கள் எழில், சரவணக்குமார்(பொ), மண்டல சுகாதார அலுவலர் குணசேகரன், உதவி பொறியாளர் சதீஷ்குமார், Lion Services Limited நிறுவனத்தின் இயக்குநர் சுதா, திட்டமேலாளர் ஆசிர் மற்றும் மாநகராட்சி அலுவலர்கள் உடனிருந்தனர்.
