நாள்தோறும் கோவையில் இருந்து டெல்லிக்கு நேரடி விமான சேவையை வழங்குகிறது ஸ்பைஸ்ஜெட்

கோவை : கோவையில் இருந்து நாள்தோறும் அடிப்படையில் டெல்லிக்கு விமான சேவையை ஸ்பைஸ்ஜெட் விமான நிறுவனம் வழங்குகிறது. 

அதன்படி, எஸ்.ஜி.8561 என்ற எண் கொண்ட விமானம் காலை 07.50 மணிக்கு டெல்லியில் இருந்து புறப்பட்டு, 11 மணிக்கு கோவையை வந்தடைகிறது. எஸ்.ஜி.8562 விமானம் காலை 11.40 மணிக்கு கோவையில் இருந்து புறப்பட்டு 02.45 டெல்லியை சென்றடைகிறது. இந்த விமானம் கோவையில் இருந்து டெல்லி செல்லும் முதல் நேரடி விமானம் என்பது குறிப்பிடத்தக்கது. 

இதேபோல, சென்னை, பெங்களூரூ உள்பட பல்வேறு நகரங்களுக்கான விமான சேவைகள் கோவையில் இருந்து வழங்கப்படுகிறது. காலை 11.05 மணி, இரவு 08.15 மற்றும் 09.55 மணிக்கு என சென்னைக்கு 3 விமானங்கள் நாள்தோறும் இயக்கப்படுகின்றன. காலை 10.50 மற்றும் மாலை 05.45 என இருநேரங்களில் கோவையில் இருந்து பெங்களூரூவுக்கு நேரடி விமானங்கள் இயக்கப்படுகிறது. 

"கோவையில் இருந்து டெல்லிக்கு வழங்கப்பட்டுள்ள நேரடி விமான சேவை, அடிக்கடி வெளிநாடுகளுக்குச் செல்லும் பயணிகளுக்கு மகிழ்ச்சியளிக்கிறது. இதேபோல, குறைந்த கட்டணத்தில் மேலும் பல நேரடி விமான சேவைகள் வழங்கினால், பயணிகளுக்கு உதவிகரமாக இருக்கும்," என்கிறார் விமானப் பயணி சதிஷ்.

விரைவில் கோவை விமான நிலையத்தில் இருந்து டெல்லிக்கு ஏர்இந்தியா நேரடி விமான சேவையை வழங்க இருப்பதாக தகவல்கள் வெளியாகியுள்ளன.