வெள்ளப் பெருக்கு காரணமாக திருமூா்த்தி மலை பஞ்சலிங்க அருவிக்கு செல்ல தடை

திருப்பூர்: உடுமலை அருகே திருமூா்த்தி மலை பஞ்சலிங்க அருவியில் ஏற்பட்ட வெள்ளப் பெருக்கு காரணமாக சுற்றுலாப் பயணிகள் செல்ல தடை விதிக்கப்பட்டுள்ளது.

திருப்பூா் மாவட்டம் உடுமலை அருகே உள்ளது திருமூா்த்தி மலை பஞ்சலிங்க அருவி. இங்கு தினமும் வெளி மாவட்டம் மற்றும் கேரளா பகுதியிலிருந்து ஏராளமான சுற்றுலாப் பயணிகள் வந்து செல்கின்றனர். தற்போது மேற்கு தொடர்ச்சி மலை பகுதியில் தொடர்ந்து கனமழை பெய்து வருவதால் குழிப்பட்டி, குருமலை, பாலாறு பகுதிகளில் நீர்வரத்து அதிகரித்துள்ளது.



இதனால், பஞ்சலிங்க அருவிக்கு நீர் வரத்து அதிகரித்து வெள்ளப் பெருக்கு ஏற்பட்டுள்ளது. எனவே பாதுகாப்பு காரணத்திற்காக சுற்றுலா பயணிகள் அருவி பகுதிக்கு செல்ல வனத்துறையினர் தடை விதித்துள்ளனர். இதனால் வெளி மாவட்ட சுற்றுலாப் பயணிகள் அருவியின் கீழ் பகுதியான கோவில் வளாகத்தில் குளித்து செல்கின்றனர்.

சுற்றுலாப் பயணிகள் அருவி பகுதிக்கு செல்லாமல் கண்காணிக்க வனத்துறை சார்பில் வனக்காவலா்கள் நியமிக்கப்பட்டுள்ளனர். வெள்ளப் பெருக்கு ஏற்பட்டுள்ளதால் அருவியின் கீழ்ப்பகுதியில் உள்ள அமணலிங்கேஸ்வரா் கோவில் பகுதி முழுவதும் தண்ணீர் சூழ்ந்திருப்பதால், கோவில் நடை அடைக்கப்பட்டுள்ளது.