உதகையில் வீடு புகுந்து 15 சவரன் நகை கொள்ளை: மாவட்ட கண்காணிப்பாளர் நேரில் ஆய்வு

நீலகிரி: நீலகிரி மாவட்டம் உதகையில் பூட்டியிருந்த வீட்டில் 15 சவரன் நகை மற்றும் ரூ.6000 கொள்ளையடிக்கப்பட்டதை தொடர்ந்து சம்பவ இடத்திற்கு நேரில் சென்ற மாவட்ட காவல் துறை கண்காணிப்பாளர் ஆய்வு நடத்தினார்.



உதகை ஹெச்.பி.ஆர் காலனிய சேர்ந்தவர் ரோகிணி. உதகை அரசு மருத்துவமனையில் செவிலியராக பணியாற்றி வருகிறார். இவர் நேற்று இரவு 7 மணிக்கு பணிக்கு சென்றுவிட்டு இன்று காலை வீடு திரும்பினார். அப்போது, வீட்டின் பூட்டு உடைக்கப்பட்டிருந்தது.

இதனால் அதிர்ச்சியடைந்த ரோகிணி வீட்டிற்குள் சென்று பார்த்த போது, பீரோவில் வைக்கப்பட்டிருந்த 15 சவரன் நகை மற்றும் ரூ.6000 கொள்ளையடிக்கப்பட்டது தெரியவந்தது. இதனைத் தொடர்ந்து கிடைத்த தகவலின் பேரில் சம்பவ இடத்திற்குச் சென்ற மாவட்ட காவல் துறை கண்காணிப்பாளர் சண்முக பிரியா, உதகை நகர காவல் துறை துணை கண்காணிப்பாளர் திருமேனி மற்றும் கைரேகை நிபுணர்கள் ஆகியோர் ஆய்வு மேற்கொண்டனர்.

மேலும், கொள்ளையர்களைப் பிடிக்க தனிப்படை அமைத்துத் தேடுதல் நடைபெறுவதாகவும், நாளைக்குள் கொள்ளையர்களை பிடித்து விடுவோம் என்றும் மாவட்ட காவல்துறை கண்காணிப்பாளர் தெரிவித்துள்ளார். கொள்ளைச் சம்பவத்தால் அப்பகுதியில் பரபரப்பு ஏற்பட்டது.