கருணாநிதியின் உடல்நிலை சீராக உள்ளது: காவேரி மருத்துவமனை

காவேரி மருத்துவமனையில் அனுமதிக்கப்பட்டுள்ள தி.மு.க., தலைவர் கருணாநிதியின் உடல்நிலை சீராக இருப்பதாக மருத்துவமனை நிர்வாகம் அறிவித்துள்ளது.

தி.மு.க., தலைவர் கருணாநிதிக்கு நேற்று முன்தினத்தில் இருந்து உடல்நலக் குறைவு ஏற்பட்டுள்ளது. நேற்று நள்ளிரவு மீண்டும் அவரது உடல்நிலை மோசமானதால், ஆம்புலன்ஸ் மூலம் சிகிச்சைக்காக அவர் காவேரி மருத்துவமனைக்கு கொண்டு செல்லப்பட்டார். அங்கு மருத்துவ குழுவினர் தீவிர சிகிச்சை அளித்து வருகின்றனர். முதற்கட்ட சிகிச்சைக்குப் பிறகு கருணாநிதியின் உடல்நிலையில் முன்னேற்றம் இருப்பதாகத் தெரிவிக்கப்பட்டது.

ரத்த அழுத்தக் குறைவு காரணமாக கருணாநிதி மருத்துவமனையில் சேர்க்கப்பட்டதாகவும், தீவிர மருத்துவ சிகிச்சைக்கு பிறகு ரத்த அழுத்தம் சீராக உள்ளதாகவும் காவேரி மருத்துவமனை தெரிவித்தது. 



இந்த நிலையில், காவேரி மருத்துவமனை நிர்வாகம் வெளியிட்டுள்ள அறிக்கையில், "தி.மு.க., தலைவர் கருணாநிதிக்கு மருத்துவமனையில் அளிக்கப்பட்டு வரும் மருந்துகளின் உதவியால், அவரது உடல்நிலை தொடர்ந்து சீராக இருக்கிறது. அனுபவம் வாய்ந்த மருத்துவர்களின் தீவிர கண்காணிப்பில், அவசர சிகிச்சைப் பிரிவில் வைக்கப்பட்டுள்ளார்," எனத் தெரிவிக்கப்பட்டுள்ளது.