சிங்கப்பூர் பயணத்துறை சார்பில் கோவை உள்ளிட்ட முக்கிய நகரங்களில் 'ரோட் ஷோ'

கோவை: இந்திய சுற்றுலாப் பயணிகளை கவரும் வகையில் சிங்கப்பூர் பயணத்துறை சார்பில் கோவை உள்ளிட்ட முக்கிய நகரங்களில் 26-ம் தேதி வரை 'ரோட் ஷோ'விற்கு ஏற்பாடு செய்யப்பட்டுள்ளது.

 

2018-ம் ஆண்டு ஜனவரி மாதம் முதல் மே மாதம் வரை இந்தியாவில் இருந்து சிங்கப்பூருக்கு 6 லட்சம் சுற்றுலாப் பயணிகள் சென்றுள்ளனர். இது கடந்த 2017-ம் ஆண்டுடன் ஒப்பிடும்போது 17 சதவீதம் அதிகமாகும். கப்பல் மூலமாக சிங்கப்பூருக்கு வரும் இந்திய சுற்றுலாப் பயணிகளின் எண்ணிக்கையிலும் மிகப்பெரிய வளர்ச்சி ஏற்பட்டுள்ளது. கடந்த ஆண்டு இந்தியாவில் இருந்து 1 லட்சத்து 27 ஆயிரம் பயணிகள் கப்பல் மூலம் சிங்கப்பூருக்கு சென்றுள்ளனர். கடந்த 2016-ம் ஆண்டோடு ஒப்பிடும்போது இது 25 சதவீதம் அதிகமாகும்.

2018-ம் ஆண்டில் இந்திய சுற்றுலா பயணிகளை வரவேற்க, சிங்கப்பூர் பயணத்துறை பல்வேறு முன் முயற்சிகளை எடுக்கவுள்ளது. ஜூலை 16 முதல் 26-ம் தேதி வரை இந்தியாவின் 8 முன்னணி நகரங்களில் சாலைநிகழ்ச்சிகளை (ரோட் ஷோ) நடத்தவுள்ளது. டிராவல் ஏஜெண்டுகள் உட்பட சிங்கப்பூர் பயணத்துறையின் சுமார் 40 பங்குதாரர்கள் இதில் பங்கேற்க உள்ளனர். கோவை, திருச்சி, லூதியானா, கொச்சி, கொல்கத்தா, சூரத், வைசாக், லக்னோ ஆகியவை இந்நிகழ்ச்சி நடைபெறவுள்ள 8 நகரங்களாகும். ‘ஆர்வத்துடன் புதிய வாய்ப்புகளை உருவாக்கலாம்’ என்ற கருத்தில் நடத்தப்படும் இந்த ரோட் ஷோக்களில் டிராவல் ஏஜென்சிகள் மூலம் வழங்கப்படும் புதிய சலுகைகள், பயணிகளை ஈர்க்கும் விஷயங்களைப் பற்றி சிங்கப்பூர் பயணத்துறை விளக்கிக் கூறவுள்ளது. 

சிங்கப்பூர் பயணத்துறையின் பிரதிநிதிகள் குழுவின் பிராந்திய இயக்குநர் ஜி.பி.ஸ்ரீதர் கூறுகையில், "சிங்கப்பூர் சுற்றுலாவுக்கு இந்தியா மிகப்பெரிய மூலச் சந்தையாக விளங்குகிறது. பல்வேறு வர்த்தக முன்முயற்சிகள் மற்றும் பங்குதாரர்கள் மூலம் பயணிகளை ஈர்ப்பதில் சிங்கப்பூர் பயணத்துறை மிகச்சிறப்பாகச் செயல்பட்டு வருகிறது. இந்த ஆண்டில் ஜனவரி மாதம் முதல் மே மாதம் வரை 6.1 இந்தியப் பயணிகளை வரவேற்றதை நினைத்துப் பெருமைப்படுகிறோம்,” என்றார்