பெண் பத்திரிக்கையாளர்களை இழிவுபடுத்திய விவகாரம்: நீதிமன்றத்தில் ஆஜரானார் எஸ்.வி., சேகர்

சென்னை: பெண் பத்திரிக்கையாளர்களை இழிவுபடுத்திய வழக்கில் பா.ஜ.க., பிரமுகர் எஸ்.வி., சேகர் எழும்பூர் நீதிமன்றத்தில் இன்று ஆஜரானார்.

கடந்த சில நாட்களுக்கு முன்பு, பெண் பத்திரிகையாளர்களை இழிவுபடுத்தும் விதமாக, தனது முகநூல் பக்கத்தில் கருத்து பதிவிட்டிருந்தார். எனவே அவரைக் கைது செய்யக் கோரி தமிழகம் முழுவதும் காவல்நிலையங்களில் பத்திரிக்கையாளர்கள் புகார் அளித்தனர். அதன்பேரில், பல்வேறு வழக்குகள் பதிவு செய்யப்பட்டன.

மேலும், பத்திரிகையாளர்கள் சார்பில் நீதிமன்றங்களிலும் வழக்கு தொடரப்பட்டது. இதனிடையே, எஸ்.வி.சேகர் முன் ஜாமீன் கோரிய மனுக்கள் தள்ளுபடி செய்யப்பட்டன. மேலும், எஸ்.வி.சேகரை சென்னை எழும்பூர் நீதிமன்றத்தில் ஆஜராகி முன் ஜாமீன் பெறுமாறு உச்சநீதிமன்றம் உத்தரவிட்டிருந்தது. ஆனால், எஸ்.வி. சேகர் ஆஜராகாமல், உல்லாசமாக சுற்றித் திரிந்து வந்தார்.

இந்த நிலையில், சென்னை மத்திய குற்றப்பிரிவு போலீசார் எஸ்.வி.சேகர் மீது குற்றப்பத்திரிகை தாக்கல் செய்து, கைதாவதிலிருந்து அவரைக் காப்பாற்றினர். அதனால், எழும்பூர் நீதிமன்றம் தன் மீது சுமத்தப்பட்டுள்ள குற்றச்சாட்டு குறித்து விளக்கமளிக்க நேரில் ஆஜராக எஸ்.வி.சேகருக்கு சம்மன் அனுப்பி உத்தரவிட்டது. அதன்படி, பலத்த பாதுகாப்புக்கிடையே எஸ்.வி.சேகர் இன்று நீதிமன்றத்தில் ஆஜராகினார்.