புனேவிலும் சென்னை அணிக்கான போட்டிகளை நடத்துவதில் சிக்கல்..?

மகாராஷ்டிரா : சென்னையிலிருந்து மாற்றப்பட்ட ஐ.பி.எல்., போட்டியை தண்ணீர் பற்றாக்குறை காரணமாக புனேவில் நடத்துவதிலும் சிக்கல் ஏற்பட்டுள்ளது. 

காவிரி மேலாண்மை வாரியம் அமைக்கும் வரையில் ஐ.பி.எல். போட்டிகளை அனுமதிக்கமாட்டோம் என தமிழகம் முழுவதும் போராட்டம் நடைபெற்றது. மைதானத்திற்கு உள்ளேயும், வெளியேயும் பாதுகாப்பு அதிகரிக்கப்பட்டு விளையாட்டு போட்டி நடைபெற்றது. போட்டியின் போது, காலணி வீச்சு உள்ளிட்ட அசம்பாவிதங்களும் அரங்கேறியது. இதனால், மைதானத்தில் சிறிது நேரம் பாதிக்கப்பட்டது. இதைத்தொடர்ந்து, சென்னையில் மேற்கொண்டு 6 போட்டிகளை நடத்தவிட மாட்டோம் என போராட்டக்காரர்கள் தரப்பில் தெரிவிக்கப்பட்டது. சென்னை போலீசாரும் ஐ.பி.எல்., போட்டிகளுக்குப் பாதுகாப்பு வழங்க முடியாது என தெரிவித்தனர். இதனால், சென்னையில் நடைபெற உள்ள போட்டிகளை வேறு இடங்களுக்கு மாற்றம் முடிவு செய்யப்பட்டது. 

இந்த நிலையில், ஐ.பி.எல்., போட்டிகள் புனேவுக்கு மாற்றப்பட்டுள்ளதாக அறிவிக்கப்பட்டுள்ளது. சென்னையில் நடக்கவிருந்த 6 போட்டிகளுக்கான டிக்கெட் பணத்தை திரும்ப பெற்றுக் கொள்ளலாம். ஏப்., 14-ம் தேதியிலிருந்து 20-ம் தேதிக்குள் பெற்றுக் கொள்ளலாம் என ஐ.பி.எல்., நிர்வாகம் அறிவிப்பு வெளியிட்டுள்ளது. ஆனால், தற்போது புனேவிலும் சென்னை ஐ.பி.எல்., போட்டிகள் நடைபெறுவதில் சிக்கல் ஏற்பட்டு உள்ளது. தண்ணீர் பற்றாக்குறை உள்ள புனேவில் கிரிக்கெட் மைதானத்துக்கு தண்ணீர் எப்படி வழங்க முடியும் என மகாராஷ்டிரா கிரிக்கெட் சங்கத்திற்கு மும்பை நீதிமன்றம் நோட்டீஸ் அனுப்பி உள்ளது.