கோவையில் பிரண்ட்ஸ் ஆஃப் போலீஸ் அறிமுகம் மற்றும் ஆலோசனைக் கூட்டம்

கோவை: கோவையில் பிரண்ட்ஸ் ஆஃப் போலீஸ் நண்பர்கள் அறிமுகம் மற்றும் ஆலோசனைக் கூட்டம் இன்று ராமநாதபுரம் காவல் நிலைய கூட்ட அரங்கத்தில் நடைபெற்றது. 

இந்நிகழ்ச்சிக்கு, காவல் ஆய்வாளர் இளங்கோவன் தலைமை தாங்கினார். கூட்டத்தில் அவர் பேசுகையில், "இன்று புதிதாக இணைந்துள்ள பிரண்ட்ஸ் ஆஃப் போலீஸ் நண்பர்கள் தினமும் ஐந்து பேர் வீதம் காவல் நிலையத்திற்கு வருகை தந்து காவலர்களோடு இணைந்து இரவு ரோந்து பணியாற்ற வேண்டும். நீங்கள் குடியிருக்கும் பகுதியில் எந்த ஒரு அசம்பாவிதமும் நடைபெற்றாலும் காவல் நிலையத்தில் தெரிவிக்க வேண்டும்.

 

நீங்கள் வசித்து வரும் பகுதியில் உள்ள ஒவ்வொரு நபரைப் பற்றிய அடிப்படை விவரங்களைத் தெரிந்து வைத்திருக்க வேண்டும். உங்கள் பகுதியில் நடைபெறும் அனைத்து பொது விழாக்களிலும் காவலர்களோடு இணைந்து பாதுகாப்புப் பணியில் ஈடுபட வேண்டும். உங்கள் பகுதியிலுள்ள போக்குவரத்து சிக்னல்களில் காலை, மாலை நேரங்களில் காவலர்களுடன் இணைந்து போக்குவரத்தை சரிசெய்ய உதவி செய்ய வேண்டும். உங்கள் பகுதியிலுள்ள இளைஞர்கள், பொதுமக்களை பிரண்ட்ஸ் ஆஃப் போலீசில் இணைக்க வேண்டும்" என்றார். 

இந்த நிகழ்ச்சியில் 35 பேர் பிரண்ட்ஸ் ஆஃப் போலீசில் புதிதாக இணைந்தது குறிப்பிடத்தக்கது.