ஆசிரியர் திட்டியதால் குளிர் பானத்தில் எலி மருந்து கலந்து குடித்த மாணவிகள்

மதுரை : மதுரை மாவட்டம் திருமங்கலத்தில் உள்ள தனியார் பள்ளியில் ஆசிரியர் திட்டியதால் மனமுடைந்த ஐந்து மாணவிகள் ஒன்றாக குளிர்பானத்தில் எலி மருந்தை கலந்து குடித்த சம்பவம் அதிர்ச்சியை ஏற்படுத்தியுள்ளது.

மதுரையிலுள்ள தனியார் பெண்கள் மேல்நிலைப் பள்ளியில் 9ஆம் வகுப்பு பயிலும் மாணவிகள் 5 பேரை ஆசிரியர் நேற்று திட்டியதாகக் கூறப்படுகிறது. இதனால் மனம் உடைந்த அந்த ஐந்து பேரும் கடையில் எலி மருந்தை வாங்கி, வகுப்பறையிலேயே வைத்து குளிர்பானத்தில் கலந்து குடித்துள்ளனர். சிறிது நேரத்தில் அவர்கள் மயங்கி விடவே அதிர்ச்சி அடைந்த சக மாணவிகள், ஆசிரியரிடம் தெரிவித்துள்ளனர்.

ஆனால் அந்த ஐந்து பேரையும் பள்ளி நிர்வாகம் உடனடியாக மருத்துவமனைக்குக் கொண்டு செல்லாமல், பெற்றோருக்கு தகவல் தெரிவித்து வரவழைத்ததாக குற்றம் சாட்டப்படுகிறது. பின்னர் அரசு மருத்துவமனை கொண்டு செல்லப்பட்ட அந்த ஐந்து மாணவிகளுக்கும் சிகிச்சை அளிக்கப்பட்டு வருகிறது. இதுகுறித்து தகவல் அறிந்து மருத்துவமனை சென்ற மாவட்ட ஆட்சியர் வீரராகவ ராவ் மாணவிகளிடம் விசாரணை மேற்கொண்டார்.



அப்போது அங்கிருந்த மாணவிகளின் பெற்றோர், பள்ளி நிர்வாகத்தின் மீது நடவடிக்கை மேற்கொள்ள வேண்டி மாவட்ட ஆட்சியரிடம் வலியுறுத்தினர்.