கோவை, ஜனவரி 06
கோவையில் இஸ்கான் அமைப்பு சார்பில் 26-வது ஆண்டாக நடைபெற்ற ஜெகநாதர் தேர்த்திருவிழாவில் ஆயிரத்திற்கும் மேற்பட்டோர் கலந்து கொண்டு சுவாமி தரிசனம் செய்தனர்.
கோவையில் ஆண்டுதோறும் இஸ்கான் எனப்படும் கிருஷ்ண பக்தி இயக்கம் சார்பில் தேர்திருவிழா நடைபெற்று வருகிறது. இந்நிலையில், 26-வது ஆண்டாக நடைபெற்ற திருவிழாவில் அலங்கரிக்கப்பட்ட 42 அடி உயரத் தேரில் ஜெகநாதர், சுப்ரதாதேவி சிலைகளுடன் பலதேவர் சிலைகளும் அமைக்கப்பட்டு நகரின் முக்கிய வீதிகள் வழியாக வலம் வந்தது. இதில், ஆயிரக்கணக்கான பக்தர்கள் கலந்து கொண்டு கோலாட்டம், கும்மியாட்டம் உள்ளிட்டவற்றுடன் ஆடிப்பாடி மகிழ்ந்தனர்.
மேலும், ஹரே கிருஷ்ணா, ஹரே ராமா என்ற முழக்கங்களை எழுப்பியபடி, அவர்கள் பேரணியில் கலந்துகொண்டனர். பொதுவாக, மக்கள் கோவில்களில் கடவுளை வழிபடச் செல்லும் நிலையில், மக்களைக் காண கடவுள் வருவதாக நம்பிக்கையுடன் இத்தேர் திருவிழா வருடந்தோறும் நடத்தப்பட்டு வருவதாக நிகழ்ச்சி ஒருங்கிணைப்பாளர்கள் தெரிவித்தனர். தேர்திருவிழாவை முன்னிட்டு பக்தர்கள் உற்சாகத்துடன் ஆடிப்பாடிச் சென்ற காட்சிகள் பார்வையாளர்களை பரவசத்தில் ஆழ்த்தியது.