பரளிக்காடு சூழல் சுற்றுலா இன்று முதல் மீண்டும் தொடக்கம்

Coimbatore: கோவை மாவட்டம் காரமடை வனச்சரகத்திற்கு உட்பட்ட பில்லூர் அணையின் நீர்த்தேக்க பகுதியில் நடைபெற்று வந்த பரளிக்காடு சூழல் சுற்றுலா கடந்த ஒரு வார காலமாக கனமழை எச்சரிக்கையால் தற்காலிகமாக நிறுத்தப்பட்டிருந்தது.




சுற்றுலா பயணிகள் மற்றும் வனத்துறை அதிகாரிகளின் பாதுகாப்பை கருத்தில் கொண்டு இந்த நடவடிக்கை எடுக்கப்பட்டது. வானிலை ஆய்வு மையம் வழங்கிய கனமழை எச்சரிக்கையை தொடர்ந்து வனத்துறையினர் சூழல் சுற்றுலாவை நிறுத்தி வைத்திருந்தனர்.




இந்த நிலையில், வானிலை மேம்பட்டு கனமழை எச்சரிக்கை வாபஸ் பெற்றதையடுத்து இன்று முதல் சூழல் சுற்றுலா மீண்டும் இயக்கப்படும் என காரமடை வனச்சரகர் ஜோசப் ஸ்டாலின் தெரிவித்துள்ளார்.




பில்லூர் அணையின் அழகிய நீர்த்தேக்க பகுதியில் அமைந்துள்ள பரளிக்காடு பகுதி இயற்கை காட்சிகளுக்கு பிரசித்தி பெற்றது. இங்கு படகு சவாரி, பறவைகள் கண்காணிப்பு, மற்றும் வனவிலங்குகள் பார்வையிடுதல் போன்ற சுற்றுலா செயல்பாடுகள் மேற்கொள்ளப்படுகின்றன.




சூழல் சுற்றுலா செல்ல விரும்புவோர் https://Coimbatorewilderness.com/ என்ற இணையதளத்தில் ஆன்லைன் மூலம் முன்பதிவு செய்து கொள்ளலாம் என வனத்துறையினர் தெரிவித்துள்ளனர். குடும்பத்துடன் செல்வோர் முன்கூட்டியே பதிவு செய்ய அறிவுறுத்தப்படுகிறார்கள்.




வனத்துறையினர் சுற்றுலா பயணிகளிடம் சுற்றுச்சூழலை பாதுகாக்கவும், பிளாஸ்டிக் பொருட்களை தவிர்க்கவும் வேண்டுகோள் விடுத்துள்ளனர். வனவிலங்குகளுக்கு உணவு அளிக்கக்கூடாது என்றும் எச்சரித்துள்ளனர்.