முதல்வரின் தனிப்பட்ட ஜோதிடரின் OSD நியமனம் ரத்து: தமிழக அரசு உத்தரவு

சென்னை:பொதுமக்கள் மற்றும் எதிர்க்கட்சிகளின் கடும் விமர்சனங்களைத் தொடர்ந்து, முதலமைச்சரின் சிறப்புப் பணி அதிகாரியாக (OSD) நியமிக்கப்பட்டிருந்த அவரது ஜோதிடர் ரிக்கே ராதன் பண்டிட் வெற்றிவேலின் நியமனத்தை தமிழக அரசு ரத்து செய்துள்ளது.

தமிழக அரசின் அதிகாரப்பூர்வ உத்தரவின்படி, மே 12, 2026 அன்று வெளியிடப்பட்ட ஆணை எண் 675 மூலம் வழங்கப்பட்ட நியமனம், தற்போது மே 13, 2026 தேதியிட்ட ஆணை எண் 684 மூலம் திரும்ப பெறப்பட்டுள்ளது என்று அறிவிக்கப்பட்டுள்ளது.

“Officer on Special Duty to Chief Minister” பதவிக்கான நியமனம் உடனடியாக ரத்து செய்யப்படுவதாக அந்த உத்தரவில் குறிப்பிடப்பட்டுள்ளது. மேலும், இந்த ரத்து நடவடிக்கை முதலமைச்சர் அலுவலகத்தின் குறிப்பின் அடிப்படையில் மேற்கொள்ளப்பட்டதாகவும் தெரிவிக்கப்பட்டுள்ளது.

இந்த உத்தரவில் தமிழக அரசின் முதன்மை செயலாளர் ரீட்டா ஹரிஷ் தக்கர் கையெழுத்திட்டுள்ளார்.

நியமனம் வெளியான சில மணி நேரங்களிலேயே அரசியல் வட்டாரங்களில் சர்ச்சையை ஏற்படுத்திய நிலையில், ஒரே நாளில் அந்த நியமனம் ரத்து செய்யப்பட்டிருப்பது அரசியல் மற்றும் நிர்வாக வட்டாரங்களில் பரபரப்பை ஏற்படுத்தியுள்ளது. இருப்பினும், நியமனம் ஏன் ரத்து செய்யப்பட்டது என்பது குறித்து அரசு தரப்பில் அதிகாரப்பூர்வ விளக்கம் வெளியாகவில்லை.