கோவை குற்ற விவாதிப்பு கூட்டத்தில் சிறந்த காவல் துறையினருக்கு கண்காணிப்பாளர் பாராட்டு

Coimbatore: கோவை மாவட்ட காவல் கண்காணிப்பாளர் கார்த்திகேயன் தலைமையில் மாதாந்திர குற்ற விவாதிப்பு கூட்டம் செப்டம்பர் 23 அன்று காவல் கண்காணிப்பாளர் அலுவலகத்தில் நடைபெற்றது.

இக்கூட்டத்தில் மாவட்டத்தின் கூடுதல் காவல் கண்காணிப்பாளர்கள், காவல் துணைக் கண்காணிப்பாளர்கள், காவல் ஆய்வாளர்கள், காவல் நிலைய பொறுப்பு அதிகாரிகள் மற்றும் மாவட்ட காவல் அலுவலகத்தின் சிறப்பு பிரிவு காவல் அதிகாரிகள் கலந்து கொண்டனர்.



கடந்த மாதம் நடந்த கொலை, கொள்ளை, திருட்டு மற்றும் போதைப் பொருட்கள் விற்பனை போன்ற குற்றச் செயல்களில் தொடர்புடைய நபர்களைக் கைது செய்து, நீதிமன்றத்தில் குற்றவாளிகளுக்கு தண்டனை பெற்றுத் தர சிறப்பாக பணியாற்றிய காவல் அதிகாரிகள் மற்றும் ஊழியர்களை பாராட்டி ஊக்குவிக்கும் வகையில் மாவட்ட காவல் கண்காணிப்பாளர் பாராட்டு சான்றிதழ்களை வழங்கினார்.

பாராட்டு பெற்றவர்களில் காவல் ஆய்வாளர்கள் 3 பேர், உதவி ஆய்வாளர்கள் 6 பேர், சிறப்பு உதவி ஆய்வாளர்கள் 8 பேர், தலைமைக் காவலர்கள் 5 பேர், முதல் நிலைக் காவலர்கள் 3 பேர், மற்றும் காவலர்கள் 17 பேர் என மொத்தம் 42 பேர் அடங்குவர். இந்த பாராட்டு விழா காவல் துறையினரின் உற்சாகத்தை மேலும் அதிகரிக்கும் என எதிர்பார்க்கப்படுகிறது.