தீத்திப்பாளையம் அருகே நீர்வழிப்பாதை ஆக்கிரமிப்பு: நடவடிக்கை எடுக்காமல் திரும்பிச் சென்ற அதிகாரிகள்..!

Coimbatore: கோவை மாவட்டம் தீத்திப்பாளையம் அருகே உள்ள பீட்டுபள்ளம் பகுதியில் 2.5 ஏக்கர் பரப்பளவில் அமைந்துள்ள நீர்வழிப்பாதை ஆக்கிரமிக்கப்பட்டுள்ளதாக புகார் எழுந்துள்ளது. இப்பகுதியில் உள்ள தொழில் நிறுவனங்கள் வண்டி பாதையை ஆக்கிரமித்துள்ளதாகவும் தெரிவிக்கப்பட்டுள்ளது.

மேலும், 200 ஆண்டுகள் பழமையான சங்கிலி கருப்பராயன் கோயிலுக்கு செல்லும் நீர்வழிப்பாதையும் ஆக்கிரமிக்கப்பட்டுள்ளதாக தமிழ்நாடு விவசாயிகள் சங்கம் மாவட்ட ஆட்சியரிடம் முன்னதாக மனு அளித்திருந்தது. இதையடுத்து, வருவாய்த்துறை அதிகாரிகள் சமீபத்தில் ஆக்கிரமிப்பாளர்களுக்கு நோட்டீஸ் வழங்கியிருந்தனர்.



இந்நிலையில், ஜூலை 12 ஆம் தேதி பேரூர் வருவாய்த்துறை அதிகாரிகள் ஆக்கிரமிப்புகளை அகற்ற பீட்டுபள்ளம் பகுதிக்கு சென்றனர். ஆனால், அங்கு ஆக்கிரமிப்பாளர்கள் தாங்கள் முன்னதாகவே நிலத்தை அளந்ததாக கூறி, மீண்டும் நிலத்தை அளக்க வேண்டும் என வலியுறுத்தினர். இதனால் அதிகாரிகளுக்கும் ஆக்கிரமிப்பாளர்களுக்கும் இடையே வாக்குவாதம் ஏற்பட்டது.

இந்த சூழ்நிலையில், பேரூர் வருவாய்த்துறை அதிகாரிகள் எந்தவித நடவடிக்கையும் எடுக்காமல் திரும்பிச் சென்றுவிட்டனர். இச்சம்பவம் உள்ளூர் மக்கள் மத்தியில் அதிருப்தியை ஏற்படுத்தியுள்ளது. ஆக்கிரமிப்புகளை உடனடியாக அகற்ற வேண்டும் என்று பொதுமக்கள் கோரிக்கை விடுத்துள்ளனர்.