தமிழ்நாடு அரசுப் பணியாளர்கள் தேர்வாணையத்தின் மூலம் வரும் ஏப்ரல் 8ம் தேதியன்று முற்பகல் மற்றும் பிற்பகல் என இருவேளைகளில் கைத்தறி மற்றும் ஜவுளி உதவி இயக்குநர் பதவிக்கான போட்டித் தேர்வு நடைபெறவுள்ளது.
கோவையில் 2 தேர்வு மையங்களில் இத்தேர்வு நடைபெறவுள்ளது. இத்தேர்வினை 818 நபர்கள் எழுதுகின்றனர். இதனை நடத்த 3 முதன்மை கண்காணிப்பாளர்கள், ஒரு மொபைல் அலுவலர், 2 வீடியோ கிராபர்கள் மற்றும் தமிழ்நாடு அரசுப் பணியாளர் தேர்வாணைய ஆய்வு அலுவலர்கள் தமிழ்நாடு அரசுப் பணியாளர் தேர்வாணையத்தால் நியமனம் செய்யப்பட்டுள்ளனர்.
தேர்வு மையங்களில் பாதுகாப்பின் பொருட்டு போதுமான காவலர்கள் நியமிக்கப்பட்டுள்ளனர். தேர்வு மையத்திற்கு தமிழ்நாடு மின்சார வாரியத்தால் தடையில்லா மின்சார வசதி செய்யப்பட்டுள்ளது.
இத்தேர்வு எழுதும் தேர்வர்கள் தமிழ்நாடு அரசுப் பணியாளர் தேர்வாணையத்தால் வழங்கப்பட்ட நுழைவுச் சீட்டு கொண்டு செல்ல வேண்டும் எனவும், தேர்வு அறைக்குள் மொபைல் போன் உள்ளிட்ட மின்னியக்க கருவிகளை எடுத்துச் செல்ல வேண்டாம் எனவும் தெரிவிக்கப்பட்டுள்ளது.
தேர்வு எழுதுபவர்கள் ஏதேனும் முறைகேட்டில் ஈடுபட்டால் அவர்கள் எதிர்காலத்தில் அரசு தேர்வுகள் எழுத தடை செய்யப்படுவது மட்டுமின்றி அவர்கள் மீது குற்றவியல் நடவடிக்கையும் எடுக்கப்படும் என டிஎன்பிஎஸ்சி தேர்வுகள் முதன்மை ஒருங்கிணைப்பாளர் வெளியிட்டுள்ள செய்திக்குறிப்பில் தெரிவித்துள்ளார்.