கோவை மாவட்டம், தொண்டாமுத்தூர் பகுதியில் கடந்த 25 நாட்களாக குடிநீர் விநியோகம் சீராக வழங்கபடவில்லை என குற்றஞ்சாட்டி அப்பகுதி பொதுமக்கள் 500-க்கும் மேற்பட்டோர் இன்று தொண்டாமுத்தூர் பேருந்து நிலையம் முன்பு காலிக் குடங்களுடன் சாலை மறியலில் ஈடுபட்டனர். தொடர்ந்து, மறியலில் ஈடுபட்டோர் 15 பேருந்துகளையும் சிறை பிடித்தனர். இதனால் அங்கு போக்குவரத்து பாதிக்கப்பட்டது.
இது குறித்து அப்பகுதி மக்கள் கூறும் போது, வறட்சியான சூழ்நிலை மற்றும் தற்போது குடிநீர் தட்டுப்பாடு ஏற்பட்டுள்ள சூழலில் தண்ணீர் விநியோகிக்க போதுமான நடவடிக்கைகளை அதிகாரிகள் மேற்கொள்ளவில்லை. உடனடியாக மாற்று ஏற்பாடுகளை செய்ய வேண்டும் என கோரிக்கை விடுத்தனர்.
பொதுமக்களின் இந்த திடீர் சாலை மறியலால் அப்பகுதியில் சுமார் 2 மணி நேரம் போக்குவரத்து பாதிக்கப்பட்டது. இதைத்தொடர்ந்து, சம்பவ இடத்திறகு வந்த அதிகாரிகள் உரிய நடவடிக்கை மேற்கொள்வதாக உறுதி அளித்ததைத் தொடர்ந்து பொதுமக்கள் கலைந்து சென்றனர்.
தொண்டாமுத்தூர் தொகுதி, தமிழக ஊரக வளர்ச்சி மற்றும் சிறப்பு திட்ட அமைச்சர் எஸ்.பி.வேலுமணியின் தொகுதி என்பது குறிப்பிடத்தக்கது.