பாலம் பணியை விரைந்து முடிக்க நகராட்சிக்கு பொதுமக்கள் வேண்டுகோள்

கோவை: பொள்ளாச்சியில் மந்தமாக நடைபெறும் பணிகளை முடுக்கிவிட பொதுமக்கள் கோரிக்கை விடுத்துள்ளனர்.

பொள்ளாச்சி நகராட்சி ஆர்.ஆர், தியேட்டர் ரோடு, குடியிருப்புகள் மற்றும் வணிக நிறுவனங்கள் நிறைந்த பகுதியாக உள்ளது. இங்கு, செக்கு வீதியில் சாக்கடை கால்வாய் தோண்டப்பட்டு, பல மாதங்களாகியும் சீரமைக்கப்படாமல் இருந்தது.

அவ்வழியாக பொதுமக்கள் செல்ல முடியாமல், வேறு வழியாக சுற்றிச் செல்லும் நிலை காணப்பட்டது.மேலும், மழைக்காலங்களில் மழைநீருடன் கழிவு நீரும் கலந்து தேங்கி நிற்பதால், கொசுத்தொல்லையால் தொற்று நோய்கள் பரவும் அபாயம் உள்ளது. கடும் துர்நாற்றம் வீசியதால், கால்வாய் அருகே கடை வைத்து இருப்போர் மிகுந்த சிரமப்பட்டு வந்தனர்.

இந்நிலையில், கடந்த, 10 நாட்களுக்கு முன், செக்கு வீதியில் பாலம் கட்டுவதற்காக ரோடு தோண்டப்பட்டது. இவ்வழியாக வாகனங்கள் செல்லாமல் இருக்க, தடுப்பு அமைக்கப்பட்டுள்ளது. பணிகள் மந்தமாக நடப்பதால், இவ்வழியாக செல்ல வேண்டிய வாகன ஓட்டுநர்கள், பல்லடம் ரோடு வழியாக சுற்றிச் செல்கின்றனர். எனவே, நகராட்சி நிர்வாகம் பாலம் கட்டும் பணியை துரிதப்படுத்தி முடித்து, போக்குவரத்துக்கு வழிவகை செய்ய வேண்டும்.