வடகிழக்குப் பருவமழை: முன்னெச்சரிக்கை நடவடிக்கைகள் குறித்து கோவையில் அமைச்சர் செங்கோட்டையன் விளக்கம்

Coimbatore: வடகிழக்குப் பருவமழையை எதிர்கொள்ள கோவையில் அனைத்து முன்னெச்சரிக்கை நடவடிக்கைகளும் எடுக்கப்பட்டு வருவதாக அமைச்சர் செங்கோட்டையன் தெரிவித்தார்.

கோவை விமான நிலையத்தில் செய்தியாளர்களைச் சந்தித்துப் பேசிய அவர், வடகிழக்குப் பருவமழையை எதிர்கொள்ளவும், இயற்கைச் சீற்றங்களில் இருந்து மக்களைப் பாதுகாக்கவும் முதல்வர் பல்வேறு நடவடிக்கைகளை மேற்கொண்டு வருவதாகக் கூறினார். மக்களின் அன்றாட வாழ்க்கையில் எந்தவிதமான தடங்கலும் ஏற்படாமல் இருக்க ஒவ்வொரு துறைக்கும் தேவையான அறிவுரைகள் வழங்கப்பட்டு வருவதாகவும் தெரிவித்தார்.

கன்னியாகுமரி மற்றும் ராமநாதபுரம் மாவட்டங்களில் மழைப்பொழிவு அதிகரிக்க வாய்ப்புள்ளதால், தொடர்ந்து ஆய்வுகள் மேற்கொள்ளப்பட்டு வருவதாக அமைச்சர் கூறினார். மத்திய மற்றும் மாநில அளவிலான ஆய்வுகளுடன், தமிழகப் பேரிடர் மேலாண்மைக் குழுவும் தொடர்ந்து கண்காணித்து வருவதாகத் தெரிவித்தார். மழைநீர் நிலவரம் மற்றும் இரவு நேரங்களில் ஏற்படும் மாற்றங்கள் குறித்து சம்பந்தப்பட்ட துறைகளுக்குத் தகவல்கள் உடனுக்குடன் தெரிவிக்கப்பட்டு வருவதாகவும் அவர் விளக்கினார்.

மேயர் பிரியா தொடர்பான குற்றச்சாட்டு குறித்த செய்தியாளர்களின் கேள்விக்குப் பதிலளித்த அமைச்சர் செங்கோட்டையன், மக்கள் பணிகளில் அனைவரும் ஒன்றிணைந்து செயல்பட வேண்டும் என்றார். மக்களுக்கான பணிகளை மேற்கொள்வது அனைவரின் பொறுப்பாகும் என்றும், அரசு மேற்கொள்ளும் பணிகளுக்கு அனைவரும் உறுதுணையாக இருக்க வேண்டும் என்றும் தெரிவித்தார்.

முதல்வரின் சுற்றுப்பயணத்தின்போது நடைபெறும் ரோடு ஷோவில் அனுமதியின்றி நுழைவது சரியான செயலா என்பதை சம்பந்தப்பட்டவர்கள்தான் விளக்க வேண்டும் என்று கூறிய அவர், லட்சக்கணக்கான மக்கள் கூடும் நிகழ்ச்சிகளில் இதுபோன்ற தடைகளை ஏற்படுத்துவது சரியா என்பது குறித்துத் தெளிவுபடுத்த வேண்டும் என்றார்.

இதற்கிடையே, நாம் தமிழர் கட்சியின் வேட்பாளர் கார்த்திகா கைது செய்யப்பட்டபோது அவர் அணிந்திருந்த உடை குறித்த கேள்விக்குப் பதிலளித்த அமைச்சர் செங்கோட்டையன், அவர் என்ன உடையில் இருந்தார் என்பது தனக்குத் தெரியாது என்றும், இதுபோன்ற கருத்துகளுக்குத் தனது பொறுப்பில் இருந்து பதிலளிக்க முடியாது என்றும் தெரிவித்தார்.