கோவையில் மழைநீர் சேகரிப்பு குறித்து தன்னார்வ அமைப்புகளுடன் மாநகராட்சி ஆணையாளர் கலந்தாய்வு

Coimbatore: கோயம்புத்தூர் மாநகராட்சிக்குட்பட்ட பகுதிகளில் மழைநீர் சேகரிப்பு வசதிகளை மேம்படுத்தும் நடவடிக்கைகள் குறித்து தன்னார்வ அமைப்புகளுடன் மாநகராட்சி ஆணையாளர் கட்டா ரவி தேஜா தலைமையில் கலந்தாய்வுக் கூட்டம் நடைபெற்றது.

கோயம்புத்தூர் மாநகராட்சி, மேற்கு மண்டலம், ஆர்.எஸ்.புரம், மாநகராட்சி கலையரங்கத்தில் உள்ள ஒருங்கிணைந்த கட்டளை மற்றும் கட்டுப்பாட்டு மைய கூட்டரங்கில் இந்தக் கூட்டம் அக்டோபர் 23, 2026 அன்று நடைபெற்றது.

இக்கூட்டத்தில் மாநகராட்சி ஆணையாளர் தெரிவிக்கையில், நகராட்சி நிர்வாகம் மற்றும் குடிநீர் வழங்கல் துறையின் அரசாணையின்படி, ஏற்கனவே உள்ள மழைநீர் சேகரிப்பு அமைப்புகளைப் புதுப்பித்தல், புதிய அமைப்புகளை உருவாக்குதல், விழிப்புணர்வு மற்றும் சமூகப் பங்கேற்பு, கண்காணிப்பு ஆகியவை மேற்கொள்ளப்பட வேண்டும் என தெரிவிக்கப்பட்டுள்ளதாக கூறினார். இதனையொட்டி, மாநகராட்சிக்குட்பட்ட பல்வேறு பகுதிகளில் மழைநீர் கட்டமைப்பு வசதிகள் புதிதாக உருவாக்கப்பட்டும், ஏற்கனவே உள்ள மழைநீர் கட்டமைப்புகளை சீரமைப்பு செய்தும் வருவதாக அவர் தெரிவித்தார். அதேபோல், கல்வி நிறுவனங்கள், தொழிற்சாலைகள் உள்ளிட்ட நிறுவனங்களில் மழைநீர் சேகரிப்பு கட்டமைப்புகள் இருப்பதை நேரடியாக களப்பணியாளர்கள் மூலம் பார்வையிட்டு ஆய்வு செய்யப்பட்டு வருவதாகவும் அவர் குறிப்பிட்டார்.

மேலும், மாநகராட்சிக்குட்பட்ட பகுதிகளில் உள்ள பொதுமக்களுக்கு மழைநீர் சேகரிப்பின் அவசியம் குறித்து விழிப்புணர்வு ஏற்படுத்தும் வகையில் விழிப்புணர்வு துண்டு பிரசுரங்கள் வழங்கப்பட்டு வருகின்றன. இதுவரை சுமார் ஒரு இலட்சத்திற்கும் மேற்பட்ட வீடுகளுக்கு மழைநீர் சேகரிப்பு கட்டமைப்பு வசதிகள் உள்ளனவா என்பதனை கள ஆய்வு செய்து கணக்கெடுக்கப்பட்டது. வடகிழக்கு பருவமழையையொட்டி, கால்வாய்கள், மழைநீர் வடிகால்கள் உள்ளிட்ட நீர்நிலைகள் தூர்வாரப்பட்டதாகவும், மாநகராட்சியும் தன்னார்வலர்களும் இணைந்து மாதந்தோறும் கூட்டம் நடைபெறும் எனவும், இதில் தன்னார்வலர்கள் தங்களது செயல்திட்டத்தை (Plan of Action) வழங்கலாம் எனவும் மாநகராட்சி ஆணையாளர் தெரிவித்தார்.

பின்னர், இக்கூட்டத்தில் பங்கேற்ற தன்னார்வலர்கள் மாநகராட்சிக்கு சொந்தமான பூங்காக்கள், மழைநீர் அதிகம் தேங்கக்கூடிய இடங்களில் மழைநீர் சேகரிப்பு கட்டமைப்புகளை ஏற்படுத்துவது தொடர்பாக ஆலோசனைகளை வழங்கினர்.

இக்கூட்டத்தில் மாநகர தலைமை பொறியாளர் விஜயகுமார், மண்டல உதவி ஆணையர்கள், மாநகராட்சி அலுவலர்கள் மற்றும் தன்னார்வ அமைப்புகளின் உறுப்பினர்கள் உட்பட பலர் கலந்து கொண்டனர்.